جی ٹی روڈ پر الغنی پٹرولیم، ہائی وے کھاریاں کے قریب ایک افسوسناک ٹریفک حادثے میں ہنڈائی شہہ زور گاڑی ٹریلر سے ٹکرا گئی، جس کے نتیجے میں ایک شخص جاں بحق ہوگیا۔
ریسکیو ذرائع کے مطابق ہنڈائی شہہ زور لاہور سے اسلام آباد جا رہی تھی کہ مبینہ طور پر ڈرائیور کو نیند آنے کے باعث گاڑی بے قابو ہو کر سامنے چلنے والے 22 ویلر ٹریلر کے عقب سے جا ٹکرائی۔
حادثہ اتنا شدید تھا کہ گاڑی کا اگلا حصہ بری طرح تباہ ہوگیا اور ڈرائیور فرنٹ کیبن میں پھنس گیا۔ ریسکیو اہلکاروں نے موقع پر پہنچ کر امدادی کارروائی کی، تاہم ڈرائیور زخموں کی تاب نہ لاتے ہوئے موقع پر ہی دم توڑ چکا تھا۔
گجرات: ڈمپر ٹرک کی موٹرسائیکل کو ٹکر، خاتون جاں بحق، شوہر شدید زخمی
جاں بحق ہونے والے شخص کی شناخت قدیر احمد ولد محمد ریاض کے نام سے ہوئی ہے، جن کی عمر 32 سال تھی اور وہ کوٹ شمس، ضلع چکوال کے رہائشی تھے۔
ریسکیو ٹیم نے ضروری کارروائی کے بعد متوفی کی میت کو تحصیل ہیڈکوارٹر اسپتال کھاریاں منتقل کر دیا، جبکہ متعلقہ پولیس نے واقعے کی تحقیقات شروع کر دی ہیں۔
