سائلین کی براہِ راست شنوائی، موقع پر احکامات جاری؛ عوام اور انتظامیہ کے درمیان فاصلے ختم
وزیر اعلیٰ پنجاب مریم نواز شریف کے "اوپن ڈور پالیسی” ویژن کو عملی جامہ پہناتے ہوئے ڈپٹی کمشنر جہلم میر رضا اوزگن نے ضلعی ہیڈکوارٹر میں ایک بڑی کھلی کچہری کا انعقاد کیا۔ کھلی کچہری کے دوران شہریوں کے مسائل، شکایات اور انتظامی امور سے متعلق درخواستوں کی براہِ راست شنوائی کی گئی، جہاں مختلف شعبہ ہائے زندگی سے تعلق رکھنے والے افراد نے بڑی تعداد میں شرکت کی۔
کچہری کے دوران ڈپٹی کمشنر میر رضا اوزگن نے سائلین کی جانب سے پیش کی جانے والی درخواستوں کا ذاتی طور پر تفصیلی جائزہ لیا اور موقع پر ہی شہریوں کو مختلف پیچیدہ معاملات پر ضروری قانونی و انتظامی رہنمائی فراہم کی۔ انہوں نے عوامی مسائل کے بروقت ازالے اور سرکاری دفاتر میں سروس ڈیلیوری کے معیار کو مزید بہتر بنانے کے لیے موقع پر موجود متعلقہ محکموں کے افسران کو سخت احکامات جاری کیے۔
میڈیا سے گفتگو کرتے ہوئے ڈپٹی کمشنر جہلم میر رضا اوزگن کا کہنا تھا کہ وزیر اعلیٰ پنجاب مریم نواز شریف کی اس اوپن ڈور پالیسی کا بنیادی مقصد عوام کو ان کی دہلیز پر فوری ریلیف پہنچانا اور سرکاری اداروں تک عام آدمی کی رسائی کو بلا روک ٹوک اور آسان بنانا ہے۔ انہوں نے عزم ظاہر کیا کہ ضلعی انتظامیہ عوامی تکالیف کے خاتمے اور بہترین انتظامی خدمات کی فراہمی کے لیے تمام تر دستیاب وسائل اور توانائیوں کو بروئے کار لا رہی ہے۔
انہوں نے مزید کہا کہ ایسی کھلی کچہریاں عوام اور ضلعی انتظامیہ کے مابین براہِ راست اور شفاف رابطے کا سب سے مؤثر ذریعہ ہیں۔ اس سے نہ صرف نچلی سطح پر شہریوں کے حقیقی مسائل کو سمجھنے میں مدد ملتی ہے بلکہ بیوروکریسی کی سطح پر سست روی کا خاتمہ کر کے عوامی شکایات پر بروقت اور یقینی اقدامات کو بھی ممکن بنایا جاتا ہے۔
