کراچی میں بینکوں سے بڑی رقم لے کر نکلنے والے شہریوں کے تحفظ کیلئے سندھ پولیس نے خصوصی سکیورٹی فراہم کرنے کا اعلان کیا ہے۔
یہ اقدام شہر میں حالیہ دنوں میں بڑھتی ہوئی اسٹریٹ کرائم کی وارداتوں کے پیش نظر کیا گیا ہے۔
پولیس حکام کے مطابق بینک سے نقد رقم نکالنے والے شہریوں کو محفوظ راستہ فراہم کرنے کیلئے پولیس اسکواڈ کی سہولت دی جائے گی تاکہ لوٹ مار کے واقعات کو روکا جا سکے۔ اس سلسلے میں مختلف تھانوں کے ایس ایچ اوز نے بینکوں کے باہر بینرز بھی آویزاں کیے ہیں جن میں شہریوں کو اس سہولت سے فائدہ اٹھانے کی ہدایت دی گئی ہے۔
کراچی سینٹرل جیل میں عدالت پیشی کے موقع پر سخت سیکیورٹی، صحافیوں کا داخلہ بند
حکام کا کہنا ہے کہ شہریوں کو اس سکیورٹی سہولت کے بارے میں آگاہی دی جا رہی ہے، تاہم اس کے باوجود بڑی تعداد میں لوگ پولیس تحفظ لینے سے گریز کر رہے ہیں۔
پولیس کے مطابق شہریوں کی جانب سے عدم دلچسپی کو سکیورٹی اداروں پر اعتماد کے مسئلے کے طور پر دیکھا جا رہا ہے، جبکہ حکام کا مؤقف ہے کہ اس اقدام کا مقصد عوام کو محفوظ بنانا اور جرائم کی شرح میں کمی لانا ہے۔
