چین میں ایک حیران کن واقعہ سامنے آیا ہے جہاں ایک چار سالہ بچہ 11 منزلہ عمارت سے گرنے کے باوجود معجزانہ طور پر زندہ بچ گیا۔ یہ واقعہ چین کے صوبے لیاؤننگ کے شہر ڈیلیان میں پیش آیا، جس نے مقامی لوگوں اور سوشل میڈیا صارفین کو حیرت میں مبتلا کر دیا۔
حادثہ کیسے پیش آیا؟
رپورٹس کے مطابق “شیاؤمنگ” نامی بچہ 11 اپریل کو اپنے اپارٹمنٹ میں اکیلا موجود تھا جبکہ اس کے والدین مختصر وقت کے لیے سامان کی ڈیلیوری کے سلسلے میں باہر گئے ہوئے تھے۔
بچے کی والدہ کے مطابق گھر سے نکلتے وقت دروازہ لاک کیا گیا تھا اور کھڑکی بھی بند تھی۔ اس کے علاوہ گھر میں نگرانی کے لیے کیمرے بھی نصب تھے تاکہ وہ کسی بھی وقت بچے پر نظر رکھ سکیں۔ تاہم کسی طرح بچے نے کھڑکی کھول لی اور ماں کو دیکھنے کی کوشش میں کھڑکی پر چڑھ گیا۔
بعدازاں وہ 11ویں منزل سے نیچے جا گرا۔
بچے نے ہوش میں آکر کیا بتایا؟
حادثے کے بعد جب بچے کو ہوش آیا تو اس نے اپنی والدہ کو بتایا کہ وہ انہیں یاد کر رہا تھا اور یہ دیکھنا چاہتا تھا کہ وہ کب واپس آئیں گی، اسی لیے وہ کھڑکی تک گیا تھا۔
اس معصوم بیان نے سوشل میڈیا پر لوگوں کو جذباتی بھی کر دیا۔
والدین پر قیامت گزر گئی
تقریباً دو گھنٹے بعد جب بچے کے والد گھر واپس آئے تو انہوں نے دیکھا کہ بچہ گھر میں موجود نہیں۔ تلاش کرنے پر معلوم ہوا کہ وہ عمارت کے نیچے زخمی حالت میں پڑا ہے۔
والد فوراً بچے کو اسپتال لے گئے جہاں ڈاکٹروں نے اس کی حالت انتہائی تشویشناک قرار دی۔
چین کا تیز رفتار انسان نما روبوٹ، یوسین بولٹ کی رفتار کے قریب پہنچ گیا
ڈاکٹروں کے مطابق بچنے کے امکانات کم تھے
میڈیکل رپورٹس کے مطابق حادثے میں بچے کی کئی ہڈیاں ٹوٹ گئیں جبکہ جگر، پھیپھڑوں اور گردوں کو بھی شدید نقصان پہنچا۔
بچے کے والد کے مطابق ڈاکٹروں نے ابتدائی طور پر کہا تھا کہ اس کے زندہ بچنے کے امکانات صرف 5 فیصد ہیں۔ ان کے بقول یہ خبر سن کر ایسا محسوس ہوا جیسے “آسمان ٹوٹ پڑا ہو”۔
معجزانہ بہتری
خوش قسمتی سے علاج کے دوران بچے کی حالت آہستہ آہستہ بہتر ہونا شروع ہوگئی۔ تقریباً 18 دن بعد اسے آئی سی یو سے جنرل وارڈ منتقل کر دیا گیا، جہاں اب بھی اس کا علاج جاری ہے۔
والدین کا کہنا ہے کہ وہ اپنے بیٹے کی زندگی بچ جانے کو کسی معجزے سے کم نہیں سمجھتے اور پُرامید ہیں کہ وہ جلد مکمل صحتیاب ہو جائے گا۔
بچوں کی حفاظت سے متعلق اہم سبق
ماہرین کے مطابق یہ واقعہ والدین کے لیے ایک اہم یاد دہانی ہے کہ چھوٹے بچوں کو گھر میں اکیلا چھوڑنے یا کھڑکیوں اور بالکونیوں کے قریب غیر محفوظ ماحول میں رکھنے سے گریز کیا جائے۔
خصوصاً بلند عمارتوں میں بچوں کی حفاظت کے لیے حفاظتی گرلز، چائلڈ لاکس اور مسلسل نگرانی کو انتہائی ضروری قرار دیا جاتا ہے تاکہ ایسے خطرناک حادثات سے بچا جا سکے۔
