جہلم: ڈسٹرکٹ پولیس آفیسر جہلم شفیق احمد چوہدری کی ہدایت پر جرائم پیشہ عناصر اور ٹریفک قوانین کی خلاف ورزی کرنے والوں کے خلاف کارروائیاں جاری ہیں، جس کے تحت تھانہ سول لائن پولیس نے اہم کارروائی کرتے ہوئے ایک ملزم کو گرفتار کر لیا۔
ترجمان جہلم پولیس کے مطابق ایس ایچ او تھانہ سول لائن نے اپنی ٹیم کے ہمراہ پنجاب سیف سٹی اتھارٹی کی نشاندہی پر کارروائی کی، جس کے دوران جعلی نمبر پلیٹ لگا کر ٹریفک قوانین کی خلاف ورزی کرنے والے ملزم کو حراست میں لیا گیا۔
پولیس نے جدید ٹیکنالوجی کا مؤثر استعمال کرتے ہوئے سیف سٹی کیمروں کے ذریعے مسلسل نگرانی اور ٹریکنگ کے بعد ملزم کو ٹریس کیا اور فوری کارروائی کر کے گرفتار کر لیا۔
حکام کے مطابق ملزم جعلی نمبر پلیٹ استعمال کرتے ہوئے مختلف ٹریفک خلاف ورزیوں میں ملوث تھا، جس کے خلاف قانونی کارروائی کا آغاز کر دیا گیا ہے۔
ڈی پی او جہلم شفیق احمد چوہدری نے کہا ہے کہ قانون شکن عناصر کے خلاف بلا امتیاز کارروائیاں جاری رہیں گی، جبکہ شہریوں کے تحفظ، ٹریفک نظم و ضبط اور امن و امان کے قیام کے لیے جہلم پولیس ہر ممکن اقدامات کر رہی ہے۔
