جہلم: رمضان المبارک کے دوران اشیائے خوردونوش کی قیمتوں میں استحکام برقرار رکھنے اور گراں فروشی کے مکمل خاتمے کے لیے ڈپٹی کمشنر جہلم میر رضا اوزگن کی زیرِ صدارت پرائس کنٹرول کمیٹی کا ایک اہم اجلاس منعقد ہوا۔
اجلاس میں ایڈیشنل ڈپٹی کمشنر جنرل جہلم شگفتہ جبین، اسسٹنٹ کمشنرز، ای اے ڈی اے فیصل بشیر اور پرائس کنٹرول مجسٹریٹس نے شرکت کی۔
اجلاس میں ڈپٹی کمشنر جہلم نے واضح ہدایات جاری کرتے ہوئے کہا کہ مقدس ماہِ رمضان میں شہریوں کو اشیائے خوردونوش کی مقررہ سرکاری نرخوں پر فراہمی ہر صورت یقینی بنائی جائے۔ انہوں نے پرائس کنٹرول مجسٹریٹس کو فیلڈ میں مانیٹرنگ مزید سخت کرنے کی ہدایت دیتے ہوئے کہا کہ کسی بھی قسم کی کوتاہی برداشت نہیں کی جائے گی۔
ڈپٹی کمشنر میر رضا اوزگن نے دو ٹوک مؤقف اختیار کرتے ہوئے کہا کہ پرائس کنٹرول کمیٹی کی جانب سے طے شدہ نرخوں کی خلاف ورزی کرنے والوں کے خلاف زیرو ٹالرنس پالیسی اپنائی گئی ہے، اور اب صرف جرمانوں تک محدود نہیں رہا جائے گا بلکہ گراں فروشوں کو براہِ راست جیل بھیجا جائے گا اور ان کی دکانیں سیل کی جائیں گی۔
انہوں نے ایڈیشنل ڈپٹی کمشنر جنرل شگفتہ جبین کو ہدایت کی کہ وہ روزانہ کی بنیاد پر مجسٹریٹس کی کارروائیوں کا جائزہ لیں تاکہ مصنوعی مہنگائی پیدا کرنے والے ذخیرہ اندوزوں کا مؤثر اور جڑ سے خاتمہ ممکن بنایا جا سکے۔
سوہاوہ:گراں فروشی پر زیرو ٹالرینس، سرکاری نرخوں سے زائد قیمت وصول کرنے والی بیف شاپ سیل
اجلاس میں ڈپٹی کمشنر جہلم نے اس امر پر زور دیا کہ رمضان المبارک میں عوام کو حقیقی ریلیف فراہم کرنا ضلعی انتظامیہ کی اولین ترجیح ہے۔ اس مقصد کے لیے ای اے ڈی اے فیصل بشیر کو منڈیوں میں نیلامی کے عمل کی شفافیت برقرار رکھنے اور قیمتوں کی کڑی نگرانی کے احکامات جاری کیے گئے۔
ڈپٹی کمشنر جہلم کا کہنا تھا کہ انتظامیہ پرائس کنٹرول کمیٹی کے فیصلوں پر سختی سے عملدرآمد کروا کر شہریوں کو گراں فروشوں کے استحصال سے بچائے گی اور بازاروں میں سستی، معیاری اور وافر اشیائے خوردونوش کی دستیابی کو ہر صورت یقینی بنایا جائے گا۔
