وزیراعلیٰ سرفراز بگٹی کا کہنا ہے کہ دہشتگردوں کے خلاف بھرپور کارروائی جاری ہے اور صوبے کو دہشتگردوں کے لیے جہنم بنایا جائے گا
بلوچستان میں سکیورٹی فورسز نے دہشتگردوں کے خلاف کارروائی کے دوران ایک بار پھر اہم کامیابی حاصل کی ہے۔ وزیراعلیٰ میر سرفراز بگٹی نے بتایا کہ دہشتگردوں کے ساتھ حالیہ جھڑپوں میں 17 سکیورٹی اہلکار شہید ہوئے، جبکہ 145 دہشتگردوں کی لاشیں سکیورٹی فورسز کے قبضے میں ہیں۔
دہشتگرد حملوں کی تفصیلات
وزیراعلیٰ بلوچستان کے مطابق دہشتگردوں نے 31 معصوم شہریوں کو بھی نشانہ بنایا۔ گوادر میں ایک حملے میں پانچ خواتین اور تین بچوں کی جانیں گئی، جو خضدار سے تعلق رکھنے والے بلوچ خاندان سے تعلق رکھتے تھے۔ سرفراز بگٹی نے واضح کیا کہ یہ لوگ خود کو بلوچ کہلاتے ہیں، لیکن حقیقت میں وہ بلوچ نہیں بلکہ دہشتگرد ہیں، جو بیرونی ایجنڈے پر کام کر رہے ہیں۔
ان کا کہنا تھا کہ کچھ دہشتگرد افغان سرزمین سے بھی کارروائیوں میں شامل ہوئے، اور معلومات ہیں کہ بشیر زیب، رحمان گل اور اللہ نظر افغانستان میں موجود ہیں۔ دہشتگرد بھارت کی ہدایات پر پاکستان میں امن و امان خراب کرنے کی کوششیں کر رہے ہیں، اور ایسے حملے اس بات کی نشاندہی کرتے ہیں کہ جب بھی پاکستان ترقی کی راہ پر گامزن ہوتا ہے، بیرونی قوتیں اسے نقصان پہنچانے کی کوشش کرتی ہیں۔
بلوچستان میں دہشت گردی کے خلاف بڑا آپریشن مکمل، 133 دہشت گرد ہلاک
آپریشن اور انٹیلی جنس
وزیراعلیٰ نے بتایا کہ سکیورٹی اداروں کے پاس دہشتگرد حملوں کی انٹیلی جنس رپورٹس موجود تھیں، جس کی بنیاد پر آپریشن کا آغاز کیا گیا۔ ان کے مطابق دہشتگردی کیخلاف یہ کارروائیاں نہ صرف سخت ہیں بلکہ شہریوں کے جانی نقصان سے بچاؤ کے لیے انٹیلیجنس بیسڈ آپریشنز کیے جا رہے ہیں۔
مذاکرات اور عزم
مذاکرات کے حوالے سے سرفراز بگٹی نے کہا کہ بی ایل اے کوئی رجسٹرڈ سیاسی جماعت نہیں، اس لیے ان سے مذاکرات کا تصور بھی مناسب نہیں۔ یہ گروہ بندوق کے زور پر اپنا نظریہ مسلط کرنا چاہتا ہے اور بلوچ عوام کو بیرونی ایجنڈے کے لیے استعمال کر رہا ہے۔
وزیراعلیٰ بلوچستان نے عزم ظاہر کیا کہ حکومت اور سکیورٹی فورسز کسی صورت سرینڈر نہیں کریں گی۔ ان کا کہنا تھا کہ بلوچستان کو دہشتگردوں کے لیے جہنم بنایا جائے گا، اور دہشتگردوں کو ان کے ٹھکانوں سے نکال کر ختم کیا جائے گا۔
