پریس کلب لاہور کے سالانہ انتخابات برائے 2026 کے نتائج سامنے آ گئے ہیں، جس میں جرنلسٹ پینل نے گرینڈ الائنس کو بڑی کامیابی سے ہرایا۔
صدر کے عہدے کے لیے ہونے والے مقابلے میں ارشد انصاری 1283 ووٹ لے کر ایک مرتبہ پھر لاہور پریس کلب کے صدر منتخب ہو گئے، جبکہ ان کے حریف اعظم چوہدری 711 ووٹ حاصل کر سکے۔
سینئر نائب صدر کے عہدے پر سلمان قریشی 1125 ووٹ کے ساتھ کامیاب رہے، جبکہ گرینڈ الائنس کی صائمہ نواز 839 ووٹ حاصل کر سکیں۔ نائب صدر کی مخصوص نشست پر ناصرہ عتیق 1045 ووٹ کے ساتھ منتخب ہوئیں، ان کے مدِ مقابل جرنلسٹ پینل کے مدثر حسین تتلہ 882 ووٹ کے ساتھ دوسرے نمبر پر رہے۔
جنرل سیکرٹری کے عہدے پر افضال طالب 1059 ووٹ لے کر کامیاب قرار پائے، جب کہ گرینڈ الائنس کے عبدالمجید ساجد 814 ووٹ اور آزاد امیدوار اعجاز مرزا 103 ووٹ حاصل کر سکے۔ جوائنٹ سیکرٹری کی نشست پر عمران شیخ 1002 ووٹ لے کر کامیاب ہوئے، جبکہ گرینڈ الائنس کے رانا محمد اکرام 959 ووٹ کے ساتھ دوسرے نمبر پر رہے۔
خزانچی کے عہدے پر سالک نواز 1035 ووٹ لے کر منتخب ہوئے، اور خواتین نائب صدر کی مخصوص نشست پر مدیحہ الماس 986 ووٹ کے ساتھ کامیاب ہوئیں، جبکہ گرینڈ الائنس کی ثمینہ پاشا 956 ووٹ کے ساتھ قریبی مقابلے میں رہیں۔
گورننگ باڈی کی 9 جنرل نشستوں میں سے 8 پر جرنلسٹ پینل کے امیدوار کامیاب ہوئے، جبکہ گرینڈ الائنس کا صرف ایک امیدوار سید بدر سعید منتخب ہو سکا۔ گورننگ باڈی کے کامیاب امیدواروں میں سید سجاد کاظمی، خواجہ سرمد فرخ، الفت حسین مغل، اسد محمود گڈو، ایم احمد رضا، سید بدر سعید، کامران خان، راجہ عظمت اور ظہیر شیخ شامل ہیں۔
گورننگ باڈی کی مخصوص اقلیتی نشست پر بھی جرنلسٹ پینل کے آشر جان 860 ووٹ لے کر کامیاب ہو گئے۔
یہ نتائج جرنلسٹ پینل کی مضبوط حکمت عملی اور ووٹرز کی بھرپور حمایت کی عکاسی کرتے ہیں۔
