لاہور ہائی کورٹ کے دو رکنی بینچ نے بانی پی ٹی آئی کے بھانجے، بیرسٹر حسان نیازی، کی ملٹری کسٹڈی اور ملٹری کورٹ کی کارروائیوں کے خلاف دائر درخواست کی سماعت سے معذرت کر دی۔
جسٹس سلطان تنویر کی سربراہی میں یہ دو رکنی بینچ کیس کی فائل کو کسی اور بینچ کے پاس بھیجنے کے لیے چیف جسٹس کو بھجوا دی۔ جسٹس سلطان تنویر نے کہا کہ اس معاملے پر پہلے بھی ایک درخواست سنگل بینچ نے سنی ہے۔ واضح رہے کہ اس سے قبل تین بینچز بھی سماعت سے معذرت کر چکے ہیں۔
حسان نیازی نے اپنے وکیل فیصل صدیقی کے ذریعے درخواست میں موقف اختیار کیا کہ 9 مئی کے کیس میں گرفتاری کے بعد انہیں سویلین عدالت میں پیش نہیں کیا گیا، اور تھانہ سرور روڈ پولیس نے قانونی حکم کے باوجود انہیں غیرقانونی طور پر ملٹری کسٹڈی میں دے دیا۔
درخواست میں استدعا کی گئی ہے کہ 17 اگست 2023 کے نوٹیفکیشن کے تحت ملٹری کسٹڈی میں لینے کا حکم کالعدم قرار دیا جائے اور عدالت انہیں جیل سے رہا کرنے یا انسداد دہشت گردی عدالت کے سامنے پیش کرنے کا حکم جاری کرے۔
