اسسٹنٹ کمشنر جہلم خان شمس الرحمٰن نے تحصیل جہلم کے مختلف میرج ہالز کا دورہ کیا، جہاں ون ڈِش ایکٹ پر عملدرآمد، صفائی کے انتظامات اور ہالز کی مجموعی صورتحال کا تفصیلی جائزہ لیا۔
دورے کے دوران اسسٹنٹ کمشنر نے ہالز میں مہیا کی جانے والی سہولیات، کھانے کے انتظام، حفظانِ صحت کے اصولوں اور پارکنگ سمیت دیگر امور کا معائنہ کیا اور موقع پر ہی متعلقہ انتظامیہ کو ہدایات جاری کیں۔
خان شمس الرحمٰن نے واضح ہدایت کی کہ ون ڈِش ایکٹ اور دیگر حکومتی قوانین پر سو فیصد عملدرآمد ہر صورت یقینی بنایا جائے، بصورتِ دیگر قانون کی خلاف ورزی کرنے والے میرج ہالز کے خلاف بھاری جرمانے، سیلنگ اور سخت قانونی کارروائی عمل میں لائی جائے گی۔
انہوں نے کہا کہ ضلعی انتظامیہ شادی ہالز میں غیر ضروری اسراف، قوانین کی خلاف ورزی اور صفائی کے ناقص انتظامات کو ہرگز برداشت نہیں کرے گی اور شہریوں کو بہتر اور صاف ستھرا ماحول فراہم کرنا انتظامیہ کی اولین ترجیح ہے۔
