اسلام آباد: قومی اسمبلی کی سب کمیٹی برائے دفاع نے Carriage By Air Act ترمیمی بل 2025ء کی منظوری دے دی۔
اس ترمیم کے تحت ہوائی جہاز کے ذریعے بین الاقوامی سفر کے دوران حادثاتی موت پر مسافر کے ورثا کو 6 کروڑ روپے، اندرون ملک سفر کے دوران حادثاتی موت پر 2 کروڑ روپے، اور سامان گم ہونے کی صورت میں ایک بیگ کے لیے 6 لاکھ روپے ادا کیے جائیں گے۔
ذیلی کمیٹی دفاع نے کیینوپ کے قرب و جوار کے مکینوں کو درپیش مسائل سے آگاہی کے لیے دورہ کرنے کا فیصلہ کیا۔ اجلاس میں ایم این اے محمد معین عامر پیرزادہ کے پی آئی اے فلائٹ کے متاثرین کو لائف انشورنس اور پراپرٹی معاوضے کی ادائیگی پر بھی غور کیا گیا۔
پی آئی اے حکام نے بتایا کہ مذکورہ خاتون رشنا عنصر کے حوالے سے ادائیگی کی جاچکی ہے۔ سب کمیٹی اجلاس میں کیرج بائی ایئر ترمیمی بل 2025ء پر تفصیلی غور کیا گیا۔
وزارت دفاع کے لیگل ایڈوائزر نے بتایا کہ بل میں تجویز ہے کہ اگر بین الاقوامی سفر کے دوران حادثے میں مسافر کی موت واقع ہوجاتی ہے تو اس کی فیملی کو 6 کروڑ روپے ملیں گے، اور سامان گم ہونے پر ایک بیگ کے لیے 6 لاکھ روپے ایئر لائن ادا کرے گی۔
انہوں نے مزید بتایا کہ اندرون ملک سفر کے دوران مسافر کی حادثاتی موت پر لواحقین کو 2 کروڑ روپے ملیں گے، جبکہ دوران سفر سامان کے گم یا نقصان ہونے کی صورت میں پانچ ہزار روپے فی کلوگرام کارگو پر معاوضہ دیا جائے گا۔
دفاع کی سب کمیٹی نے Carriage By Air Act ترمیمی بل 2025ء باضابطہ طور پر منظور کر لیا۔
