وزیرِاعلیٰ پنجاب مریم نواز شریف نے ہدایت کی ہے کہ بےسہارا بیواؤں کے قبضہ کیسز ترجیحی بنیادوں پر اور فوری طور پر حل کیے جائیں۔
ان کا کہنا تھا کہ ناجائز قبضہ کیسز کے جلد حل سے عوام کو فوری ریلیف فراہم کیا جا سکے گا اور تمام ڈپٹی کمشنرز روزانہ اجلاس کر کے ان کیسز کی پیش رفت یقینی بنائیں، جبکہ خود وزیرِ اعلیٰ اس عمل کی نگرانی کریں گی۔
پنجاب حکومت کے جاری اعلامیے کے مطابق، وزیرِ اعلیٰ نے آرڈیننس 2025ء کے مکمل نفاذ کی ہدایت دی اور قبضے کے خلاف حکومتی اقدامات کی اطلاع عوام تک پہنچانے کے لیے مساجد میں اعلانات کرنے کا حکم دیا۔
اعلامیے میں مزید کہا گیا کہ ہر تحصیل میں اسسٹنٹ کمشنر آفس میں قبضے کی درخواستیں وصول کرنے کے لیے تیار رہیں۔ وزیرِ اعلیٰ نے گجرات، لیہ، حافظ آباد اور دیگر اضلاع میں قبضے کے جلد فیصلے نہ ہونے پر اپنی ناپسندیدگی کا اظہار بھی کیا۔
تین ہفتوں میں پنجاب بھر میں ناجائز قبضے کے خلاف 2919 درخواستیں موصول ہوئی ہیں، جن میں سے ڈسٹرکٹ ڈسپیوٹ ریزولیشن کمیٹیوں نے 499 کیسز حل کر دیے ہیں۔
