آرمی چیف فیلڈ مارشل عاصم منیر نے کہا ہے کہ پاکستان ایک امن پسند ملک ہے لیکن اگر جنگ مسلط کی گئی تو اسی طرح جواب دیا جائے گا جس طرح مئی میں دیا تھا۔ انہوں نے کہا کہ اللہ کے حکم اور فرمان کے مطابق اپنے فرائض انجام دیتا ہوں اور بھارت کے خلاف جنگ میں اللہ نے پاکستان کو سربلند کیا۔
ایوان صدر میں اردن کے شاہ عبداللہ دوم کو نشانِ امتیاز عطا کرنے کی تقریب کے موقع پر گفتگو کرتے ہوئے فیلڈ مارشل عاصم منیر نے کہا کہ پاکستان نے ہمیشہ امن کی کوشش کی، مگر دشمن نے جارحیت کی تو اس کا بھرپور جواب دیا گیا۔
انہوں نے مزید کہا کہ جب مسلمان اللہ پر توکل کرتا ہے تو اللہ اس کی پھینکی ہوئی مٹی کو بھی دشمن پر میزائل بنا دیتا ہے۔ "یہ اللہ کا خاص کرم ہے کہ پاکستان نے اپنے دشمن کو دھول چٹا دی، ہماری فوج اللہ کی فوج ہے اور ہمارے سپاہی اللہ کے نام پر لڑتے ہیں۔”
فیلڈ مارشل نے کہا کہ اللہ کے حکم کے مطابق اپنے فرائض سرانجام دے رہا ہوں اور پاکستان کے دفاع کیلئے ہر لمحہ تیار ہیں۔
