6
اردن کے فرمانروا شاہ عبد اللہ دوم پاکستان کے دو روزہ دورے پر اسلام آباد پہنچ گئے۔ پاکستانی فضائی حدود میں ان کے طیارے کو پاک فضائیہ کے طیاروں نے حفاظتی حصار فراہم کیا۔
شاہ عبد اللہ کی آمد پر صدر مملکت آصف زرداری اور وزیر اعظم شہباز شریف نے نور خان ایئر بیس پر گرم جوشی سے ان کا استقبال کیا۔ اس موقع پر وفاقی وزرا، خاتون اوّل آصفہ بھٹو زرداری اور چیئرمین پی پی پی بلاول بھٹو زرداری بھی موجود تھے۔|
شاہ عبد اللہ وزیر اعظم شہباز شریف کی دعوت پر پاکستان کا سرکاری دورہ کر رہے ہیں۔ ایئرپورٹ سے وزیر اعظم ہاؤس پہنچنے پر انہیں گارڈ آف آنر پیش کیا گیا۔
دفتر خارجہ کے ترجمان کے مطابق شاہ عبد اللہ کا یہ دورہ دونوں ملکوں کے برسوں پر محیط برادرانہ تعلقات کی عکاسی کرتا ہے اور اس سے پاکستان اور اردن کے تعلقات کی اسٹریٹجک سمت مزید مضبوط ہوگی۔
دورے کے دوران شاہ عبد اللہ صدر اور وزیراعظم سے ملاقاتیں کریں گے اور ایوان صدر میں انہیں پاکستان کا اعلیٰ ترین سول ایوارڈ دیا جائے گا۔
