وزیراعلیٰ مریم نواز کی ہدایت پر لاہور، سیالکوٹ، فیصل آباد اور دیگر اضلاع میں فوج تعینات، ضلعی انتظامیہ کی امداد اور عوام کے تحفظ کیلئے 24/7 کارروائیاں جاری۔
لاہور میں وزیراعلیٰ پنجاب مریم نواز کی ہدایت پر بارشوں اور سیلاب کی صورتحال کے پیش نظر فوری امدادی اقدامات کے لیے اہم فیصلے کیے گئے ہیں۔ پنجاب کی حکومت نے لاہور، قصور، سیالکوٹ، فیصل آباد، نارووال، اوکاڑہ اور سرگودھا میں ضلعی انتظامیہ کی مدد کے لیے فوج طلب کر دی ہے۔
ضلعی انتظامیہ، پی ڈی ایم اے، ریسکیو 1122، سول ڈیفنس اور پولیس پہلے ہی فرنٹ لائن پر اپنی ذمہ داریاں ادا کر رہی ہیں۔ ضلعی انتظامیہ کی درخواست پر محکمہ داخلہ پنجاب نے وفاقی وزارت داخلہ کو مراسلہ ارسال کیا ہے، جس کے تحت فوج کی تعیناتی عمل میں لائی جائے گی۔ فوجی دستوں کی تعداد ضلعی انتظامیہ سے مشاورت کے بعد مقرر کی جائے گی اور ضرورت پڑنے پر آرمی ایوی ایشن سمیت دیگر وسائل بھی متاثرہ علاقوں میں فراہم کیے جائیں گے۔
ترجمان محکمہ داخلہ نے کہا کہ حکومت پنجاب اور تمام متعلقہ ادارے سیلابی صورتحال کو چوبیس گھنٹے مانیٹر کر رہے ہیں اور عوام کے جان و مال کے تحفظ کے لیے تمام وسائل بروئے کار لائے جا رہے ہیں۔
یاد رہے کہ پنجاب میں یہ منظم اور بروقت حکومتی ردعمل عوام کو فوری ریلیف فراہم کرنے اور کسی بھی ممکنہ بڑے نقصان سے بچاؤ کو یقینی بنانے کے لیے اہم کردار ادا کر رہا ہے۔
