اسلام آباد : چین کے وزیر خارجہ وانگ ژی نے کہا ہے کہ چین پاکستان کو اپنا قابل اعتماد اتحادی تصور کرتا ہے اور تعلقات کو نئی بلندیوں تک لے جا رہا ہے۔
اسلام آباد میں اپنے پاکستانی ہم منصب اسحاق ڈار کے ساتھ مشترکہ پریس کانفرنس کرتے ہوئے وانگ ژی نے کہا کہ دونوں ملکوں کے درمیان مختلف امور پر تفصیلی گفتگو ہوئی، جس میں سی پیک فیز ٹو پر خصوصی بات چیت شامل تھی۔ ان کا کہنا تھا کہ پاکستان اور چین کی اسٹریٹجک شراکت داری مزید مضبوط ہو رہی ہے اور علاقائی امن و استحکام دونوں کا مشترکہ ہدف ہے۔
چینی وزیر خارجہ نے وزیراعظم شہباز شریف کے دورہ چین کا بھی انتظار ظاہر کیا۔
اس موقع پر نائب وزیراعظم و وزیر خارجہ اسحاق ڈار نے کہا کہ چین کے ساتھ تمام اہم معاملات پر اتفاق رائے موجود ہے۔ انہوں نے کہا کہ پاکستان چین کی جانب سے خودمختاری اور سالمیت کے تحفظ کے عزم کو سراہتا ہے، جبکہ سی پیک فیز ٹو، عوامی روابط اور دوطرفہ تعاون کو وسعت دینے کے لیے پرعزم ہیں۔
اسحاق ڈار نے مزید کہا کہ دونوں ممالک سلامتی کونسل سمیت مختلف فورمز پر ایک دوسرے کی حمایت جاری رکھیں گے اور خطے کے امن و خوشحالی کے لیے مل کر کام کریں گے۔
