وفاقی وزیر داخلہ محسن نقوی کا کہنا ہے کہ منشیات کے استعمال اور اسمگلنگ کے خلاف قومی سطح پر جدوجہد جاری ہے، اور نئی نسل کو منشیات سے پاک ماحول فراہم کرنا حکومت کی اولین ترجیح ہے۔
اسلام آباد، وفاقی وزیر داخلہ و نارکوٹکس کنٹرول محسن نقوی نے کہا ہے کہ منشیات سے پاک معاشرہ نئی نسل کا بنیادی حق ہے اور حکومت اس حق کی فراہمی کے لیے ہر ممکن اقدامات کر رہی ہے۔ یہ بات انہوں نے منشیات کے استعمال اور غیر قانونی اسمگلنگ کے خلاف عالمی دن کے موقع پر اپنے خصوصی پیغام میں کہی۔
محسن نقوی نے کہا کہ منشیات کا بڑھتا ہوا رجحان عالمی سطح پر ایک سنگین چیلنج بن چکا ہے، جس سے نمٹنے کے لیے دنیا کو مشترکہ حکمت عملی اپنانا ہو گی۔ انہوں نے یقین دہانی کرائی کہ پاکستان منشیات کے خلاف جنگ میں عالمی برادری کے شانہ بشانہ کھڑا ہے۔
انہوں نے بتایا کہ پاکستان نے نیشنل اینٹی نارکوٹکس پالیسی کے تحت منشیات کے خاتمے کے لیے مؤثر اور جامع اقدامات کیے ہیں، جن میں انسدادِ منشیات فورس (اے این ایف) کا کردار مرکزی حیثیت رکھتا ہے۔ انہوں نے اے این ایف کے ان جوانوں کو خراجِ عقیدت پیش کیا جنہوں نے منشیات کے خلاف جنگ میں اپنی جانوں کا نذرانہ پیش کیا۔
وفاقی وزیر نے کہا کہ یہ قربانیاں ہماری اجتماعی طاقت کی علامت ہیں، اور اب وقت آ گیا ہے کہ ہم سب مل کر منشیات کے خلاف جدوجہد کو فیصلہ کن مرحلے تک پہنچائیں۔ انہوں نے کہا کہ منشیات فروش انسانیت کے دشمن ہیں اور انہیں عبرت کا نشان بنایا جائے گا۔
محسن نقوی نے اپنے پیغام میں عوام سے اپیل کی کہ وہ ایک صحت مند، منشیات سے پاک معاشرے کی تشکیل کے لیے متحد ہو جائیں اور اپنی اجتماعی کاوشوں کو مزید مستحکم کریں تاکہ ہماری آنے والی نسلیں ایک محفوظ اور روشن مستقبل حاصل کر سکیں۔
یاد رہے کہ ہر سال 26 جون کو دنیا بھر میں انسدادِ منشیات کا عالمی دن منایا جاتا ہے، جس کا مقصد منشیات کے نقصانات سے آگاہی دینا اور ان کے خلاف عالمی سطح پر شعور پیدا کرنا ہوتا ہے۔
