راولپنڈی، پاک فوج کے شعبہ تعلقات عامہ (آئی ایس پی آر) نے معرکۂ حق کے دوران جام شہادت نوش کرنے والے جوانوں اور زخمی ہونے والے اہلکاروں کی تفصیلات جاری کر دی ہیں۔
ترجمان پاک فوج کے مطابق اس معرکہ میں ملک کی حفاظت کرتے ہوئے 11 جوان شہید ہوئے، جبکہ دشمن کی جارحیت کا بھرپور جواب دیتے ہوئے 78 اہلکار زخمی ہوئے۔
جاری کردہ تفصیلات کے مطابق شہداء میں 6 کا تعلق پاک فوج جبکہ 5 کا تعلق پاک فضائیہ سے ہے۔
آئی ایس پی آر کے مطابق مادرِ وطن پر قربان ہونے والوں میں نائیک عبدالرحمان، لانس نائیک دلاور خان، لانس نائیک اکرام اللہ، نائیک وقار خالد، سپاہی عدیل اکبر اور سپاہی نثار شامل ہیں۔
پاک فضائیہ کے شہداء میں اسکواڈرن لیڈر عثمان یوسف، چیف ٹیکنیشن اورنگزیب، سینئر ٹیکنیشن نجیب سلطان، سینئر ٹیکنیشن مبشر اور کارپورل ٹیکنیشن فاروق شامل ہیں۔
آئی ایس پی آر کے مطابق بھارت نے 6 اور 7 مئی کو بلا اشتعال حملے کیے جن میں 40 عام شہری شہید ہوئے، جن میں 7 خواتین اور 15 بچے بھی شامل تھے، ان حملوں کے نتیجے میں 121 افراد زخمی ہوئے، جن میں 27 بچے اور 10 خواتین شامل ہیں۔
ترجمان کا کہنا تھا کہ ہمارے شہداء قوم کا سرمایہ افتخار ہیں، ان کی قربانیاں جرات، حب الوطنی اور قربانی کی روشن مثال ہیں، جنہیں کبھی فراموش نہیں کیا جائے گا، زخمی اہلکاروں کی جلد صحتیابی کے لیے دعاگو ہیں، قوم دشمن کے خلاف پوری طرح متحد اور پرعزم ہے، اس حوالے سے کوئی شک باقی نہیں رہنا چاہیے۔
آئی ایس پی آر نے دوٹوک انداز میں کہا کہ پاکستان اپنی خودمختاری پر کسی صورت سمجھوتہ نہیں کرے گا، اور آئندہ کسی بھی حملے کا بھرپور اور فیصلہ کن جواب دیا جائے گا۔
