میڈرڈ، اسپین اور پرتگال میں بجلی کے بڑے بریک ڈاؤن نے زندگی کو مفلوج کر دیا۔
غیر ملکی خبررساں ایجنسیوں کے مطابق بجلی کی اچانک بندش کے باعث پبلک ٹرانسپورٹ کا نظام تباہ ہوگیا، سڑکوں پر ٹریفک جام ہوگیا اور ایئرپورٹس پر متعدد پروازوں میں تاخیر ہوئی۔
اسپین اور پرتگال میں حکام فوری طور پر بریک ڈاؤن کی وجہ معلوم نہیں کر سکے، تاہم ممکنہ سائبر حملے کے امکان کو بھی مسترد نہیں کیا گیا۔
پرتگال کی بجلی کی تقسیم کار کمپنی رین نے تصدیق کی کہ بریک ڈاؤن نے پورے آئبیرین جزیرہ نما (اسپین اور پرتگال) کو متاثر کیا ہے، جب کہ فرانس کے کچھ علاقے بھی جزوی طور پر متاثر ہوئے۔
اسپین کی ریڈ الیکٹریکا کمپنی نے کہا ہے کہ وہ مقامی توانائی کمپنیوں کے ساتھ مل کر بجلی کی فراہمی بحال کرنے کی کوشش کر رہی ہے۔
اس بریک ڈاؤن کے سبب میڈرڈ اوپن ٹینس ٹورنامنٹ کے دوران اسکور بورڈز اور کیمرے بند ہوگئے جس کی وجہ سے کھیل کو روکنا پڑا۔
میڈرڈ کی سڑکوں پر ٹریفک سگنلز کے بند ہونے کی وجہ سے شدید ٹریفک جام کا سامنا کرنا پڑا، جبکہ زیر زمین میٹرو ٹرینیں بھی رک گئیں۔ مقامی میڈیا کے مطابق کئی افراد میٹرو کارز اور عمارتوں کی لفٹس میں پھنس گئے۔
پرتگال کے شہر پورٹو اور دارالحکومت لزبن میں بھی میٹرو سروس معطل ہوگئی، اور ٹرینیں بھی بند ہو گئیں۔
لزبن کے ہوائی اڈے پر بجلی کا ایمرجنسی سسٹم فعال کیا گیا، جب کہ اسپین میں 46 ہوائی اڈوں پر پروازوں میں تاخیر کی اطلاعات ہیں۔
اسپین کی ریڈ الیکٹریکا کمپنی کے مطابق شمالی اور جنوبی اسپین میں بجلی کی بحالی کا عمل شروع ہو چکا ہے، مگر مکمل بحالی میں وقت لگے گا۔
اس بریک ڈاؤن کے دوران موبائل نیٹ ورکس بھی متاثر ہوئے، جس کی وجہ سے متعدد افراد نے انٹرنیٹ کی عدم موجودگی میں خبروں کے لیے ریڈیو کا سہارا لیا۔
