واشنگٹن، امریکی صدر ڈونلڈ ٹرمپ نے ایک ایگزیکٹو آرڈر پر دستخط کر دیے، جس کے تحت وفاقی انتخابات میں ووٹ ڈالنے کے لیے شہریت کا ثبوت فراہم کرنا ضروری ہوگا۔
غیر ملکی خبر رساں ادارے کے مطابق اس نئے حکم کے تحت اب امریکی شہریوں کو ووٹر کے طور پر رجسٹریشن سے قبل اپنی شہریت کی دستاویزات پیش کرنا ہوں گی۔
صدر ٹرمپ کے دستخط شدہ ایگزیکٹو آرڈر کے تحت تمام بیلٹس انتخابات کے دن ہی وصول کیے جائیں گے، جس سے ووٹنگ کے عمل میں مزید شفافیت لانے کا دعویٰ کیا جا رہا ہے۔
دوسری جانب امریکی صدر ڈونلڈ ٹرمپ نے وضاحت کی ہے کہ قومی سلامتی کے اعلیٰ حکام کی چیٹ میں کسی قسم کی خفیہ معلومات افشا نہیں کی گئیں اور حوثیوں پر حملوں سے متعلق گفتگو میں کوئی حساس معلومات شامل نہیں تھیں۔
وائٹ ہاؤس میں میڈیا سے بات کرتے ہوئے ڈونلڈ ٹرمپ کا کہنا تھا کہ چیٹ کے معاملے کی تحقیقات ایف بی آئی کے دائرہ اختیار میں نہیں آتیں، ان کے مطابق قومی سلامتی کے مشیر اپنی ذمہ داریاں بخوبی نبھا رہے ہیں اور انہیں کسی بھی قسم کی وضاحت یا معذرت کی ضرورت نہیں ہے۔
