ایمریٹس ایئر لائن نے پاکستان کے حوالے سے بڑا فیصلہ کرتے ہوئے کراچی ایئر پورٹ پر بڑا کارگو بزنس حب بنانے کا اعلان کر دیا۔
ایمریٹس ایئرلائن نے پاکستان میں اپنے کاروبار کے حوالے سے بڑا فیصلہ کرتے ہوئے کراچی ایئرپورٹ پر اپنا کارگو بزنس حب بنانے کے لیے ایئرپورٹس اتھارٹی سے رابطہ کیا ہے۔ رپورٹ کے مطابق، ایمریٹس نے کراچی ایئرپورٹ پر 90 ہزار اسکوائر فٹ کی جگہ مانگ لی ہے، تاکہ بڑھتی ہوئی کارگو بزنس کی طلب کو پورا کیا جا سکے۔
ایمریٹس ایئرلائن کا کراچی میں سب سے زیادہ کارگو بزنس ہے، اور صرف 2024 کے دوران 27 ہزار ٹن سے زائد کارگو کراچی سے اٹھایا گیا ہے۔ اس کے مقابلے میں، پاکستان انٹرنیشنل ایئرلائن (پی آئی اے) نے 2024 کے دوران کراچی سے صرف 2 ہزار ٹن کارگو کا بزنس حاصل کیا، جو پی آئی اے کی عدم توجہی اور درست منصوبہ بندی نہ ہونے کی وجہ سے کم رہا۔
ایمریٹس ایئرلائن کی درخواست پر ایئرپورٹ اتھارٹی نے کراچی ایئرپورٹ پر کارگو ٹرمینل پر جگہ دینے کے لیے کام شروع کر دیا ہے، جس سے ایمریٹس ایئرلائن کے کراچی میں اپنے کارگو بزنس کو مزید مستحکم کرنے کی توقع کی جا رہی ہے۔
