اسلام آباد، رہنما مسلم لیگ (ن) سینیٹر طلال چوہدری کا کہنا ہے کہ حکومت کو گورنر راج جیسے اقدام پر مجبور کیا جارہا ہے۔
نجی ٹی وی چینل کے پروگرام میں گفتگو کے دوران سینیٹر طلال چوہدری کا کہنا ہے کہ حکومت کو گورنر راج جیسے فیصلے کرنے کا شوق نہیں مگر ہمیں مجبور کیا جارہا ہے، ہم سیاسی حکومت ہیں ایسا اقدام نہیں کرنا چاہتے ہیں لیکن یہ آخری وارننگ ہے۔
ن لیگی سینیٹر کا کہنا تھا کہ بشریٰ بی بی اور علی امین گنڈا پور کے وارنٹ نکلے تھے، حکومت کی آنکھیں کھلی ہیں دیکھ رہی ہے کہ کون سا اشتہاری کہاں چھپا ہوا ہے۔
ن لیگی رہنما کا کہنا تھا کہ 26 ویں آئینی ترمیم پر جو اتحادی نہیں بھی تھے ان کو ٹیبل پر بٹھایا تھا، تحریک انصاف مذاکرات کو ہماری کمزوری سمجھ بیٹھی، مسائل پر بات ہوسکتی ہے لیکن این آر آو پر نہیں، تحریک انصاف حکومت نیشنل ایکشن پلان پر بھی عمل نہیں کررہی۔
طلال چوہدری کا کہنا تھا کہ ہم بلاول بھٹو زرداری کی بات غور سے سنتے ہیں اور ان کی نشاندہی اہم ہوتی ہے۔
دوسری جانب اسپیکر پنجاب اسمبلی ملک احمد خان کا کہنا ہے کہ تحریک انصاف والے لاشیں ڈھونڈتے آرہے تھے، ان کا منصوبہ ناکام بنادیا۔
اسپیکر پنجاب اسمبلی ملک احمد خان نے میڈیا سے گفتگو کے دوران کہا کہ ایک صوبہ ریاستی مشینری استعمال کرکے وفاق پر چڑھائی کرتا ہے، سیاست اور اختلاف رائے کے نام پر جلاؤ گھیراؤ کوئی سیاسی حق نہیں، سیاست افراتفری کا نام نہیں، یہ لاشوں کے متلاشی ہیں۔
