میکسیکو کے مشہور سوشل میڈیا انفلوئنسر اور ٹک ٹاکر سیزر گاسٹیلم کو لائیو اسٹریمنگ کے دوران فائرنگ کرکے قتل کر دیا گیا۔ واقعے کے وقت وہ اپنے دوستوں کے ہمراہ ایک فاسٹ فوڈ ریسٹورنٹ کے باہر موجود تھے اور ٹک ٹاک پر براہ راست ویڈیو بنا رہے تھے۔
غیر ملکی میڈیا کے مطابق حملہ آور موٹر سائیکل پر سوار ہو کر موقع پر پہنچے، جن میں سے ایک شخص نے قریب جا کر فائرنگ کی۔ گولیاں لگنے کے نتیجے میں سیزر گاسٹیلم موقع پر ہی دم توڑ گئے، جبکہ حملہ آور واردات کے بعد فرار ہونے میں کامیاب ہو گئے۔
مقامی حکام کے مطابق سیزر گاسٹیلم کے ٹک ٹاک اکاؤنٹ پر تقریباً 6 لاکھ فالوورز موجود تھے اور وہ اپنی مزاحیہ ویڈیوز کے باعث سوشل میڈیا پر خاصے مقبول تھے۔ پولیس نے واقعے کی تحقیقات شروع کرتے ہوئے ملزمان کی تلاش کے لیے کارروائی کا آغاز کر دیا ہے۔
یہ واقعہ میکسیکو کی ریاست سینالوا کے دارالحکومت کولیاکان میں پیش آیا، جہاں منظم جرائم پیشہ گروہوں کے درمیان تنازعات کے باعث سیکیورٹی صورتحال پہلے ہی تشویشناک ہے۔
ٹک ٹاکر لڑکی کے بال کاٹنے کے الزام میں گرفتار ملزمان کو رہا کرنے کا حکم
سیزر گاسٹیلم کا قتل میکسیکو میں سوشل میڈیا شخصیات کو درپیش خطرات پر ایک بار پھر سوالات اٹھا رہا ہے۔ اس سے قبل بھی ایک میکسیکن بیوٹی انفلوئنسر ویلیریا مارکیز کو لائیو ویڈیو کے دوران ان کے سیلون میں فائرنگ کرکے قتل کیا گیا تھا، جس کے بعد حکام نے تحقیقات کرتے ہوئے ایک مبینہ کارٹیل رہنما کو گرفتار کیا تھا۔
