آسٹریلیا کے خلاف ون ڈے سیریز سے قبل میڈیا سے گفتگو کرتے ہوئے قومی ٹیم کے کپتان Shaheen Shah Afridi نے کہا کہ ٹیم بھرپور جذبے اور اعتماد کے ساتھ میدان میں اترنے کے لیے تیار ہے۔ ان کا کہنا تھا کہ کھلاڑیوں نے تربیتی کیمپ میں سخت محنت کی ہے اور سیریز میں اچھی کارکردگی دکھانے کے لیے پُرعزم ہیں۔
شاہین آفریدی نے ٹیم کے اہم بلے باز Babar Azam کی اہمیت پر زور دیتے ہوئے کہا کہ ان کی موجودگی سے بیٹنگ لائن کو استحکام ملتا ہے۔ انہوں نے امید ظاہر کی کہ بابر اپنی عمدہ فارم کو برقرار رکھتے ہوئے آئندہ میچز میں بھی نمایاں کارکردگی دکھائیں گے۔
اپنی رفتار کے حوالے سے پوچھے گئے سوال پر کپتان نے مزاحیہ انداز میں کہا کہ وہ 200 کلومیٹر فی گھنٹہ کی رفتار سے بولنگ کرانے کی کوشش کریں گے، تاہم وقت گزرنے کے ساتھ مشینیں بھی پرانی ہو جاتی ہیں۔ انہوں نے کہا کہ تمام فاسٹ بولرز اپنی رفتار اور کارکردگی بہتر بنانے کے لیے مسلسل محنت کر رہے ہیں اور پاکستان کے لیے ہمیشہ اپنی بھرپور صلاحیتوں کا مظاہرہ کریں گے۔
پاک آسٹریلیا ون ڈے سیریز: مچل مارش کی جگہ کوپر کنولی اسکواڈ میں شامل
وکٹ کیپر بلے باز Mohammad Rizwan کے ٹیم میں شامل نہ ہونے کے حوالے سے شاہین نے کہا کہ کسی کھلاڑی کا ایک سیریز کے لیے منتخب نہ ہونا اس کے کیریئر کے خاتمے کا اشارہ نہیں ہوتا۔ انہوں نے مثال دیتے ہوئے کہا کہ وہ خود اور بابر اعظم بھی ماضی میں ٹیم سے باہر رہے لیکن بعد میں کامیاب واپسی کی۔
سابق کھلاڑیوں کی تنقید سے متعلق سوال کے جواب میں شاہین آفریدی نے مختصر انداز میں کہا کہ تنقید کرنے والوں کو بھی عید مبارک۔ انہوں نے مزید کہا کہ ہر کھلاڑی کی خواہش ہوتی ہے کہ وہ میچ کا بہترین کھلاڑی قرار پائے، جبکہ مستقبل کے بڑے ٹورنامنٹس خصوصاً ورلڈ کپ کی تیاری کے لیے نوجوان اور نئے کھلاڑیوں کو مواقع دینا ناگزیر ہے۔
