نواز شریف نے آزاد کشمیر کی موجودہ سیاسی صورتحال اور پارٹی امور پر غور کے لیے ایک اہم اجلاس طلب کر لیا ہے، جس میں مسلم لیگ (ن) کی آزاد کشمیر قیادت شرکت کرے گی۔
ذرائع کے مطابق اجلاس میں آزاد کشمیر کی مجموعی سیاسی صورتِ حال، پارٹی کی تنظیمی سرگرمیوں اور آئندہ سیاسی حکمت عملی پر تفصیلی تبادلہ خیال کیا جائے گا۔ اس موقع پر اہم سیاسی فیصلوں اور مستقبل کے لائحہ عمل پر غور کیے جانے کا امکان بھی ظاہر کیا جا رہا ہے۔
اجلاس میں شاہ غلام قادر، راجہ فاروق حیدر، طارق فاروق اور مشتاق منہاس سمیت آزاد کشمیر کی اہم سیاسی شخصیات شریک ہوں گی۔
آزاد کشمیر میں بے چینی کشمیر کاز کے لیے نقصان دہ ہے، بلاول بھٹو
ذرائع کا کہنا ہے کہ اجلاس کے دوران آزاد کشمیر میں مسلم لیگ (ن) کی سیاسی پوزیشن، تنظیمی ڈھانچے اور آئندہ انتخابات یا سیاسی سرگرمیوں کے حوالے سے مختلف تجاویز زیر غور آئیں گی۔ پارٹی قائد نواز شریف آزاد کشمیر کی قیادت سے موجودہ حالات پر مشاورت کے بعد آئندہ کے سیاسی لائحہ عمل کے بارے میں رہنمائی فراہم کریں گے۔
سیاسی حلقوں کے مطابق اس اجلاس کو آزاد کشمیر میں مسلم لیگ (ن) کی مستقبل کی حکمت عملی کے تناظر میں اہم قرار دیا جا رہا ہے، جبکہ اجلاس کے بعد بعض اہم فیصلوں یا اعلانات کا بھی امکان موجود ہے۔
