نوید احمد نے سائلین کی شکایات سنیں اور متعلقہ افسران کو موقع پر ہی فوری داد رسی کے احکامات جاری کردیئے۔
ڈپٹی کمشنر گوجرانوالہ نوید احمد نے وزیراعلیٰ پنجاب مریم نواز شریف کے احکامات کی روشنی میں اوپن ڈور پالیسی کے تحت روزانہ کی بنیاد پر شہریوں کے مسائل سننے کا سلسلہ جاری رکھا ہوا ہے۔ ضلعی انتظامیہ کی جانب سے تمام سرکاری دفاتر میں پبلک ڈیلنگ کے مقررہ اوقات پر عملدرآمد بھی یقینی بنایا جا رہا ہے۔
روزانہ شہریوں کی شکایات کی سماعت
ڈپٹی کمشنر نوید احمد نے اپنے دفتر میں آنے والے سائلین سے ملاقات کی اور ان کے مسائل و شکایات براہِ راست سنیں۔ اس موقع پر انہوں نے مختلف نوعیت کی درخواستوں پر متعلقہ محکموں کے افسران کو موقع پر ہی ہدایات جاری کرتے ہوئے شہریوں کی فوری داد رسی یقینی بنانے کا حکم دیا۔
ضلعی انتظامیہ کے مطابق سرکاری دفاتر میں پبلک ڈیلنگ کے لیے مقررہ وقت صبح 10 بجے سے دوپہر ساڑھے 12 بجے تک ہے، جس پر عملدرآمد یقینی بنانے کے لیے متعلقہ افسران کو ہدایات جاری کی گئی ہیں۔
سائلین کو غیر ضروری چکروں سے بچانے کی ہدایت
ڈپٹی کمشنر نے اسسٹنٹ کمشنرز اور صوبائی محکموں کے سربراہان کو سختی سے ہدایت کی کہ شہریوں اور سائلین کو بلاوجہ سرکاری دفاتر کے چکر نہ لگوائے جائیں۔
ڈپٹی کمشنر گوجرانوالہ کے علی الصبح اچانک دورے، شہری سہولیات کا جائزہ
انہوں نے کہا کہ قانون کے مطابق فوری نوعیت کے مسائل کو ترجیحی بنیادوں پر حل کیا جائے اور شہریوں کی شکایات کے ازالے میں غیر ضروری تاخیر سے گریز کیا جائے۔ متعلقہ افسران کو ہدایت کی گئی کہ ہر درخواست کا میرٹ پر جائزہ لے کر بروقت کارروائی عمل میں لائی جائے۔
عوامی شکایات کا بروقت ازالہ اولین ترجیح
نوید احمد نے واضح کیا کہ شہریوں کے مسائل کا حل ضلعی انتظامیہ کی اولین ترجیح ہے اور اس سلسلے میں کسی بھی قسم کی غفلت یا تاخیر برداشت نہیں کی جائے گی۔
انہوں نے تمام متعلقہ افسران پر زور دیا کہ عوامی شکایات کو ترجیحی بنیادوں پر حل کیا جائے اور سرکاری دفاتر میں آنے والے شہریوں کو بہتر سہولیات فراہم کی جائیں۔ ڈپٹی کمشنر نے مزید کہا کہ عوام دوست اقدامات کو مؤثر بنانے اور شہریوں کو ریلیف کی فراہمی کے لیے تمام دستیاب وسائل بروئے کار لائے جائیں۔
