چیئرمین پاکستان تحریک انصاف بیرسٹر گوہر نے کہا ہے کہ ملک میں جاری سیاسی مسائل کا حل صرف سیاسی انداز اور مذاکرات کے ذریعے ہی ممکن ہے۔ انہوں نے زور دیا کہ بات چیت کے دروازے ہمیشہ کھلے رہنے چاہئیں تاکہ مسائل کو افہام و تفہیم سے حل کیا جا سکے۔
راولپنڈی میں میڈیا سے گفتگو کرتے ہوئے بیرسٹر گوہر نے کہا کہ ان کی خواہش ہے کہ مذاکرات کا سلسلہ جاری رہے اور کسی بھی سطح پر رابطے منقطع نہ کیے جائیں۔ انہوں نے کہا کہ جب دروازے کھلے رہتے ہیں تو نہ صرف مثبت ماحول قائم رہتا ہے بلکہ مسائل کے حل کی راہیں بھی نکلتی ہیں۔
انہوں نے واضح کیا کہ پاکستان پیپلز پارٹی کے ساتھ کسی معاملے پر کوئی بات چیت نہیں ہو رہی۔ ان کا کہنا تھا کہ ان کا بنیادی مطالبہ صرف یہ ہے کہ بانی پاکستان تحریک انصاف تک رسائی دی جائے۔
پاکستان پہلے، کسی بھی مخالف بیان کی حمایت نہیں کریں گے: بیرسٹر گوہر
بیرسٹر گوہر نے مزید کہا کہ اپوزیشن کی بات سننا جمہوری عمل کا اہم حصہ ہے اور راستے بند کرنے سے مسائل مزید بڑھتے ہیں۔ انہوں نے مطالبہ کیا کہ بانی پی ٹی آئی سے پارٹی رہنماؤں، اہل خانہ اور ڈاکٹروں کی ملاقاتیں یقینی بنائی جائیں تاکہ ان کی صورتحال سے آگاہی حاصل ہوسکے۔
