لاہور، امیر جماعت اسلامی حافظ نعیم الرحمان نے کہا ہے کہ غزہ کے معاملے پر اقوام متحدہ کے سیکرٹری جنرل کے نام پیٹیشن دائر کریں گے۔
لاہور منصورہ میں میڈیا سے گفتگو کرتے ہوئے حافظ نعیم الرحمان کا کہنا تھا کہ اسرائیل کی دہشت گردی کا سب سے بڑا حامی امریکا اور برطانیہ ہیں، مغربی ممالک کے با ضمیر لوگ اسرائیلی بربریت پر احتجاج کر رہے ہیں، غزہ کو ملبے کا ڈھیر بنا دیا گیا ہے، غزہ کے سارے ہسپتال تباہ ہو گئے ہیں اور دنیا میں خاموشی ہے۔ مسلم ممالک نے بے حسی کی چادر اوڑھ رکھی ہے۔
انہوں نے کہا کہ فلسطینیوں کی نسل کشی کی جا رہی ہے، امریکا انسانی حقوق کی باتیں کرتا ہے، حماس کے ہاتھوں اگر 4 بچے بھی ہلاک ہو جائیں تو امریکا دنیا میں طوفان کھڑا کر دیتا ہے، لیکن اسرائیلی مظالم پر دنیا بھر میں خاموشی ہے۔ پاکستان کے حکمران اور اپوزیشن جماعتیں انجمن غلامان امریکا بنی ہوئی ہیں، امریکا کے بوٹ پالش کرنے سے کسی کو کچھ نہیں ملے گا، امریکا کسی کا دوست نہیں ہے۔
امیر جماعت اسلامی کا کہنا تھا کہ امریکا، اسرائیل کا ساتھ دینے والوں کو تاریخ کبھی معاف نہیں کرے گی، پونے دو سال سے غزہ پر بمباری ہو رہی ہے، غزہ کا پانی بند کر دیا گیا ہے روز محشر اس خاموشی کا جواب دینا پڑے گا، اسرائیلی بربریت کا پاکستان کو بھرپور جواب دینا ہوگا۔
حافظ نعیم الرحمان نے کہا کہ اسرائیلی بربریت کے خلاف آج سے پورے پاکستان میں جلسے اور مارچ شروع ہو رہے ہیں، گیارہ اپریل کو لاہور میں بڑا مارچ کریں گے، جو امریکی سفارت خانے کی طرف ہوگا۔
انہوں نے کہا کہ لاہور کے بعد کراچی میں مارچ ہوگا، اور آج سے جماعت اسلامی اپنی تمام معمول کی سرگرمیاں معطل کر رہی ہےاور پورے پاکستان میں عوامی مہم شروع کر دی جائے گی۔
امیر جماعت اسلامی نے کہا کہ پوری دنیا ڈونلڈ ٹرمپ کا گھیراؤ کرے، ہمیں اپنے حصے کا کردار ادا کرنا ہے، اقوام متحدہ کے سیکرٹری جنرل کے نام پیٹیشن دائر کریں گے، حکمرانوں، وکلا، کسانوں، اور مزدوروں کے پاس بھی جائیں گےاور دنیا کو پیغام دیں گے کہ ہم زندہ قوم ہیں اور فلسطینیوں کے ساتھ ہیں۔
