ہالی ووڈ کے معروف اداکاروں انجلینا جولی اور بریڈ پٹ کے خاندان میں ناموں سے متعلق ایک اور پیش رفت سامنے آئی ہے، جس کے مطابق ان کے بڑے بیٹے میڈوکس نے قانونی طور پر اپنے نام سے والد کا خاندانی نام ’’پٹ‘‘ حذف کر دیا ہے۔
رپورٹس کے مطابق میڈوکس نے مئی 2026 میں نام کی تبدیلی کے لیے باضابطہ قانونی درخواست جمع کرائی تھی، جس کی منظوری کے بعد یہ تبدیلی قانونی طور پر مکمل ہو گئی ہے۔ تاہم اطلاعات کے مطابق وہ اس فیصلے سے پہلے ہی اپنے مختلف پروفیشنل پراجیکٹس میں والدہ کا خاندانی نام ’’جولی‘‘ استعمال کر رہے تھے۔
تفصیلات کے مطابق 2024 کی فلم ’’ماریہ‘‘ میں انہیں ’’میڈوکس جولی پٹ‘‘ کے طور پر کریڈٹ کیا گیا، جبکہ 2025 کی فلم ’’کوتور‘‘ میں بطور اسسٹنٹ ڈائریکٹر ان کا نام صرف ’’میڈوکس جولی‘‘ درج کیا گیا۔
یہ پہلا موقع نہیں کہ جولی اور پٹ کے بچوں نے اپنے نام سے والد کا نام ہٹانے کا رجحان دکھایا ہو۔ اس سے قبل بھی خاندان کے دیگر بچوں میں یہ رجحان دیکھا گیا کہ وہ عوامی سطح پر اپنے نام میں ’’پٹ‘‘ استعمال کرنے سے گریز کر رہے ہیں یا اسے کم کر رہے ہیں۔
رپورٹس کے مطابق ان کے چھ بچوں میں سے کم از کم چار نے مختلف سطحوں پر اپنے نام میں تبدیلی یا ’’پٹ‘‘ کے استعمال سے اجتناب کیا ہے، جس سے یہ ظاہر ہوتا ہے کہ وہ زیادہ تر اپنی شناخت والدہ کے خاندانی نام سے جوڑ رہے ہیں۔
یاد رہے کہ انجلینا جولی اور بریڈ پٹ کی ملاقات 2003 میں فلم ’’مسٹر اینڈ مسز اسمتھ‘‘ کے سیٹ پر ہوئی تھی۔ دونوں نے 2014 میں شادی کی تھی تاہم 2016 میں ان کی علیحدگی کے بعد طلاق اور بچوں کی تحویل کے معاملات طویل عرصے تک زیر بحث رہے۔
بعد ازاں دونوں فریقین کی جانب سے ایک دوسرے پر مختلف الزامات بھی سامنے آئے، جن کی تردید کی گئی۔ بریڈ پٹ نے اس دوران یہ بھی اعتراف کیا تھا کہ انہوں نے اپنی زندگی میں شراب نوشی سے چھٹکارا پانے کے لیے بحالی پروگرام میں حصہ لیا۔
یہ حالیہ نامی تبدیلیاں اس بات کی عکاسی کرتی ہیں کہ جولی اور پٹ کے بچے اپنی ذاتی شناخت کو مختلف انداز میں تشکیل دے رہے ہیں، تاہم اس حوالے سے خاندان کی جانب سے تمام تفصیلات عوامی طور پر واضح نہیں کی گئیں۔
