ایشیائی ترقیاتی بینک نے پاکستان کی معاشی ترقی میں بہتری اور مہنگائی میں مزید کمی کی پیش گوئی کر دی ہے۔
ایشیائی ترقیاتی بینک کی جانب سے جاری کردہ آؤٹ لک رپورٹ کے مطابق مالی سال 2024 میں پاکستان کی معاشی ترقی کی شرح 2.4 فیصد تک جبکہ مالی سال 2025 میں جی ڈی پی کی شرح 2.8 فیصد تک جانے کا امکان ہے تاہم معاشی ترقی اصلاحاتی ایجنڈے پر عمل پیرا پالیسی کے تسلسل سے مشروط ہے۔
ایشیائی ترقیاتی بینک کی جانب سے رپورٹ میں کہا گیا ہے کہ حکومتی اخراجات میں کمی، نجی شعبے کو فروغ دینا بھی پاکستانی معیشت کے رجحان میں بہتری کی شرط ہوگی۔
رپورٹ کے مطابق مہنگائی کی شرح سال 2023 تک 29.2 فیصد تک کی سطح پر تھی جو 2024 میں کم ہو کر 23.4 فیصد پر آ چکی ہے۔
مالی سال 2024 کی پہلی ششماہی میں افراط زر زائد رہی جبکہ دوسری ششماہی میں مہنگائی کی شرح میں کمی ہوئی جس کے بعد دیگر مثبت اشاریوں سے شرح سود میں کمی ہوئی۔
ایشیائی ترقیاتی بینک کے مطابق منظم شرح سود، ایکسچینج ریٹ میں استحکام سے پاکستان میں مہنگائی مزید کم ہونے کا امکان ہے اورمالی سال 2025 میں مہنگائی کی شرح 15 فیصد تک کم ہونے کی توقع ہے۔
