صوبائی وزیر توانائی اور رہنما پیپلزپارٹی ناصر شاہ نے نوجوانوں کو خوشخبری سناتے ہوئے یہ کہا ہے کہ سندھ حکومت نے 10 ہزار نوجوانوں کیلئے آئی ٹی ٹریننگ پروگرام شروع کرنے کا اعلان کردیا ہے۔
وزیر توانائی سندھ ناصر شاہ نے ایکسپو سینٹر میں منعقدہ 25 ویں آئی ٹی سی این ایشیا کا دورہ کیا۔ اس موقع پررہنما پیپلزپارٹی ناصر شاہ کا کہنا تھا کہ سندھ حکومت نے 10 ہزار نوجوانوں کیلئے آئی ٹی ٹریننگ پروگرام شروع کیا گیا ہے، پروگرام میں حصہ لینے والوں کی تعداد 1 لاکھ بڑھائی جائے گی۔
ناصر شاہ نے کہا کہ نوجوان نہ صرف جدید ٹیکنالوجی سے فائدہ اٹھائیں گے بلکہ انہیں اس معاملے میں بہترین روزگار بھی فراہم کیا جائے گا، اس وقت غلط افواہیں پھیلا کر ہمارے نوجوانوں میں ناامیدی پھیلانے کی کوششیں کی جارہی ہیں۔
سینئر صوبائی وزیر کا کہنا تھا کہ اس پروگرام میں ملکی وغیرملکی نامور ادارے حصہ لے رہے ہیں، ایران سعودی عرب، چین، ترکی اور آسٹریلیا سمیت دیگراہم ممالک بھی شریک ہیں۔
ناصر شاہ کا انٹرنیٹ کے مسئلے پر کہنا تھا کہ ہمارے ملک میں ہی نہیں بلکہ پوری دنیا میں نیٹ کا مسئلہ ہے، نیٹ ورکنگ کے متعلق پاکستان میں منفی افواہیں پھیلائی جارہی ہیں۔
