ماؤنٹ مونگانوئی، نیوزی لینڈ نے پاکستان کو تیسرے اور آخری ون ڈے میچ میں 43 رنز سے شکست دے کر تین میچوں کی سیریز میں کلین سویپ کر دیا۔
سیریز کا اختتامی مقابلہ ماؤنٹ مونگانوئی میں کھیلا گیا، جہاں بارش کے باعث میدان گیلا ہونے کی وجہ سے ٹاس میں تاخیر ہوئی، جس کے باعث میچ کو 42 اوورز فی اننگز تک محدود کر دیا گیا، قومی ٹیم میں ایک تبدیلی کی گئی اور حارث رؤف کی جگہ نسیم شاہ کو موقع دیا گیا۔
نیوزی لینڈ کی بیٹنگ
نیوزی لینڈ نے پہلے بیٹنگ کرتے ہوئے 42 اوورز میں 8 وکٹوں پر 264 رنز بنائے۔ کپتان بریسویل نے جارحانہ انداز اپناتے ہوئے 40 گیندوں پر 58 رنز اسکور کیے، نائیک کیلے صرف 3 رنز بنا کر آؤٹ ہوئے، جب کہ رائس ماریو نے 58، ڈیرل مچل نے 43، ہنری نکولس نے 31 اور ٹم سائفرٹ نے 26 رنز کی اننگز کھیلی، محمد عباس نے 11 اور مچل ہے نے 8 رنز بنائے۔
پاکستان کی جانب سے عاکف جاوید نے شاندار بولنگ کرتے ہوئے 4 کھلاڑیوں کو آؤٹ کیا، نسیم شاہ نے 2، جبکہ فہیم اشرف اور سفیان مقیم نے ایک ایک وکٹ حاصل کی۔
پاکستان کی اننگز
ہدف کے تعاقب میں قومی ٹیم 40 اوورز میں 221 رنز پر ڈھیر ہوگئی۔ پہلی وکٹ 73 کے مجموعی اسکور پر گری جب عبداللہ شفیق 33 رنز بنا کر آؤٹ ہوئے۔ امام الحق گیند چہرے پر لگنے کی وجہ سے ریٹائرڈ ہرٹ ہو گئے۔ ان کی جگہ آنے والے عثمان خان صرف 12 رنز بنا سکے۔
بابر اعظم نے 50 رنز کی ذمہ دارانہ اننگز کھیلی، جبکہ آغا سلمان 11، محمد رضوان 37، طیب طاہر 33، نسیم شاہ 17، فہیم اشرف 3، سفیان مقیم 2 اور محمد وسیم بغیر کھاتہ کھولے پویلین لوٹ گئے۔
نیوزی لینڈ کے بولرز میں بین سیئرز نے شاندار کارکردگی کا مظاہرہ کرتے ہوئے 5 وکٹیں حاصل کیں، جیکب ڈفی نے 2 اور محمد عباس و ڈیرل مچل نے ایک ایک وکٹ لی۔
