ٹی ٹوئنٹی سیریز کے آخری میچ میں نیوزی لینڈ نے پاکستان کو 8 وکٹوں سے ہرادیا۔
ویلنگٹن میں کھیلے گئے میچ میں کیویز نے ٹاس جیت کر پہلے فیلڈنگ کا فیصلہ کیا، قومی ٹیم نے 20 اوورز میں 9 وکٹوں کے نقصان پر 128 رنز بنائے۔
جواب میں نیوزی لینڈ کے بلے بازوں نے تیز رفتار بیٹنگ کرتے ہوئے 10 اوورز میں صرف 2 وکٹوں کے نقصان پر 129 رنز بنا کر کامیابی حاصل کر لی۔
پاکستان کی بیٹنگ:
پاکستان کے اوپنرز ایک بار پھر ناکام رہے اور 23 کے مجموعی اسکور پر دونوں پویلین لوٹ گئے۔
حسن نواز بغیر کوئی رن بنائے آؤٹ ہوئے، جبکہ محمد حارث 11 رنز بنا کر چلتے بنے۔ عمیر بن یوسف اور عثمان خان 7، 7 رنز بنا سکے۔ عبدالصمد 4، شاداب خان 28، جہانداد خان 1، جبکہ سلمان علی آغا 51 رنز کے ساتھ نمایاں رہے۔ صفیان مقیم اور محمد علی کھاتہ کھولنے میں ناکام رہے، جبکہ حارث رؤف 6 رنز بنا کر ناٹ آؤٹ رہے۔
نیوزی لینڈ کی جانب سے جمی نیشم نے شاندار بولنگ کرتے ہوئے 5 وکٹیں حاصل کیں، جبکہ جیکب ڈفی نے 2، اور بین سیرز اور ایش سوڈھی نے ایک، ایک وکٹ حاصل کی۔
نیوزی لینڈ کی بیٹنگ:
نیوزی لینڈ کے بلے بازوں نے پاکستانی بولنگ کو بے بس کر دیا۔ ٹم سیفرٹ نے 38 گیندوں پر 97 رنز کی ناقابلِ شکست اننگز کھیلی،فن ایلن 27 جبکہ مارک چیپ مین 3 رنز بنا کر آؤٹ ہوئے۔
پاکستان کی جانب سے دونوں وکٹیں صفیان مقیم کے حصے میں آئیں۔
پاکستانی ٹیم میں تبدیلیاں:
اس میچ میں شاہین شاہ آفریدی کو ڈراپ کیا گیا، جبکہ عمیر بن یوسف، عثمان خان، جہانداد خان، صفیان مقیم، اور محمد علی کو ٹیم میں شامل کیا گیا، اس کے علاوہ کپتان سلمان علی آغا، حسن نواز، شاداب خان، اور حارث رؤف بھی اسکواڈ کا حصہ رہے۔
