اسلام آباد، رہنما جے یو آئی (ف) کامران مرتضیٰ کی جانب سے پی ٹی آئی کے ساتھ سڑکوں پر آنے کے امکانات کو مسترد کردیا گیا۔
نجی ٹی وی چینل کے پروگرام میں گفتگو کے دوران رہنما جے یو آئی (ف) کامران مرتضیٰ نے بتایا کہ تحریک انصاف نے کہا کہ انتخابات کا آڈٹ پورے ملک میں کرانا چاہیے، جب 2024 کے انتخابات کا وقت آیا تو یہ کہا گیا کہ مولانا کو محدود رکھا جائے اور ہم تک یہ بات پہنچا دی گئی، جو انتظام تھا اُس میں مولانا فضل الرحمان فِٹ نہیں ہورہے تھے۔
کامران مرتضیٰ کا کہنا ہے کہ پی ٹی آئی کو خیبر پختونخوا میں انتخابات کا آڈٹ کرانے کی تجویز دی تھی جو انہوں نے پہلے مانی اور پھر مسترد کردی۔
کامران مرتضیٰ کا کہنا ہے کہ تحریک انصاف کیساتھ ہماری جماعت کے اختلافات باقی ہیں، ہم نے 12 فروری کو پی ٹی آئی کو اپنے تحفظات سے آگاہ کردیا تھا مگر ابھی تک کوئی جواب نہیں آیا ،جب کہ پی ٹی آئی کے ساتھ سڑکوں پر آنے کا کوئی ارادہ نہیں۔
دوسری جانب وزیراعلیٰ پنجاب مریم نوازشریف کی جانب سے پنجاب میں 5سالہ ٹرانسپورٹ پروگرام کی منظوری دے دی گئی۔
وزیراعلیٰ مریم نوازشریف کی زیر صدارت ٹرانسپورٹ کے حوالے سے خصوصی ویڈیو لنک اجلاس ہوا، اجلاس میں پنجاب میں جدیدترین آٹو میٹڈ ریپڈ ٹرانسپورٹ سسٹم متعارف کرانے کا فیصلہ کیا گیا۔
اجلاس میں وزیراعلیٰ پنجاب کو بریفنگ کے دوران بتایا گیا کہ آٹو میٹڈ ریپڈ ٹرانسپورٹ سسٹم ملیشیاء، ابوظہبی اور قطر سمیت دنیا بھر میں ماس ٹرانزٹ کا کامیاب سسٹم ہے، عام بس کی نسبت اے آر ٹی کے لئے روڈ پر کم جگہ درکارہوگی جس پر وزیراعلیٰ مریم نوا زنے اے آر ٹی کے فوری ٹرائل رن کا حکم دے دیا۔
