جہلم پولیس نے خواتین کے تحفظ کے حوالے سے اہم کارروائی کرتے ہوئے خاتون کو ہراساں کرنے اور عفت میں خلل ڈالنے کے مقدمہ میں ملوث ملزم کو گرفتار کر لیا۔
ترجمان جہلم پولیس کے مطابق جہلم میں ایس ایچ او تھانہ کالا گجراں نے اپنی ٹیم کے ہمراہ فوری اور مؤثر کارروائی کرتے ہوئے نامزد ملزم کو گرفتار کیا۔ متاثرہ خاتون کی درخواست پر ملزم کے خلاف مقدمہ درج کیا گیا تھا، جس کے بعد پولیس نے کارروائی کرتے ہوئے اسے قانون کی گرفت میں لے لیا۔
پولیس حکام کے مطابق گرفتار ملزم سے مزید تفتیش جاری ہے اور مقدمہ کے مختلف پہلوؤں کا جائزہ لیا جا رہا ہے تاکہ مکمل حقائق سامنے لائے جا سکیں۔ تفتیش مکمل ہونے کے بعد ملزم کو قانون کے مطابق عدالت میں پیش کیا جائے گا۔
ڈسٹرکٹ پولیس آفیسر جہلم شفیق احمد چوہدری نے اس موقع پر کہا کہ خواتین کے تحفظ، عزت اور وقار پر کسی قسم کا سمجھوتہ نہیں کیا جائے گا۔ خواتین کو ہراساں کرنے، بلیک میل کرنے یا ان کے حقوق سلب کرنے والے عناصر کے خلاف بلاامتیاز قانونی کارروائی عمل میں لائی جائے گی۔
جہلم میں کھلی کچہری، ڈپٹی کمشنر نے شہریوں کے مسائل موقع پر سنے
انہوں نے مزید کہا کہ جہلم پولیس خواتین کو محفوظ ماحول فراہم کرنے اور ان کے خلاف جرائم کے خاتمے کے لیے بھرپور اقدامات کر رہی ہے۔ قانون کو ہاتھ میں لینے والے عناصر کے خلاف سخت کارروائی جاری رہے گی اور متاثرہ افراد کو ہر ممکن قانونی تحفظ فراہم کیا جائے گا۔
ڈی پی او جہلم نے شہریوں سے اپیل کی کہ خواتین کے خلاف کسی بھی قسم کی ہراسگی، بدسلوکی یا غیر قانونی سرگرمی کی صورت میں فوری طور پر پولیس سے رابطہ کریں تاکہ بروقت کارروائی عمل میں لائی جا سکے اور معاشرے میں امن و امان اور قانون کی بالادستی کو یقینی بنایا جا سکے۔
