پاکستانی اداکارہ ہما سلیم نے ایک معروف کرکٹر پر ہراسانی، دھمکیوں اور ذہنی دباؤ ڈالنے کے سنگین الزامات عائد کرتے ہوئے قانونی کارروائی کرنے کا اعلان کیا ہے۔
اداکارہ نے اپنی انسٹاگرام اسٹوری میں دعویٰ کیا کہ گزشتہ دو ماہ سے ان کا مذکورہ کرکٹر سے کوئی رابطہ نہیں، اس کے باوجود انہیں مسلسل دھمکیوں، ہراسانی اور ذہنی اذیت کا سامنا کرنا پڑ رہا ہے۔
ہما سلیم کے مطابق جب بھی وہ اپنی زندگی میں آگے بڑھنے یا معمولات بحال کرنے کی کوشش کرتی ہیں تو انہیں مختلف طریقوں سے پریشان کیا جاتا ہے۔ انہوں نے الزام لگایا کہ ان کے اہلِ خانہ، دوستوں اور پیشہ ورانہ ساتھیوں سے بھی رابطہ کیا گیا تاکہ ان کی ساکھ کو نقصان پہنچایا جا سکے، جس سے ان کے کام سے وابستہ افراد بھی متاثر ہوئے۔
اداکارہ کا کہنا تھا کہ وہ ایک توہین آمیز اور ذہنی اذیت پر مبنی تعلق میں رہیں اور طویل عرصے تک خاموشی اختیار کیے رکھی، تاہم اب ان کی برداشت ختم ہو چکی ہے۔
“فنکاروں کو عزت دی جائے”: اداکارہ میرا کا طنزیہ سوال پر سخت ردعمل
ہما سلیم نے کہا کہ وہ جلد اپنی قانونی ٹیم کے ذریعے مذکورہ کرکٹر کے خلاف موجود شواہد عوام کے سامنے پیش کریں گی اور آئندہ چند روز میں مزید انکشافات بھی کریں گی۔
تاحال متعلقہ کرکٹر کی جانب سے ان الزامات پر کوئی باضابطہ ردعمل سامنے نہیں آیا۔ یہ الزامات فی الحال اداکارہ کے بیان پر مبنی ہیں اور ان کی آزادانہ تصدیق نہیں ہو سکی۔
