ٹی وی پروگرام کے دوران تیزاب گردی سے متعلق دیے گئے ایک بیان پر سیاسی اور سماجی حلقوں میں بحث شروع ہو گئی ہے۔ اس معاملے پر مسلم لیگ (ن) سے تعلق رکھنے والی رہنما حنا پرویز بٹ نے سخت ردعمل دیتے ہوئے کہا ہے کہ ایسے بیانات خواتین کے خلاف تشدد کے خاتمے کی کوششوں کو نقصان پہنچاتے ہیں۔
حنا پرویز بٹ نے کہا کہ تیزاب گردی جیسے سنگین جرم کے متاثرین نہ صرف جسمانی طور پر شدید اذیت برداشت کرتے ہیں بلکہ زندگی بھر ذہنی اور سماجی دباؤ کا بھی شکار رہتے ہیں۔ ان کے مطابق ایسے جرائم کو غیر سنجیدہ انداز میں پیش کرنا متاثرین کے ساتھ ناانصافی کے مترادف ہے اور اس سے معاشرے میں حساسیت کم ہوتی ہے۔
یہ ردعمل اس وقت سامنے آیا جب معروف مصنف اور ٹی وی شخصیت خلیل الرحمان قمر نے ایک پروگرام میں گفتگو کے دوران تیزاب حملوں کے حوالے سے تبصرہ کرتے ہوئے کہا کہ ایسا لگتا ہے جیسے ’’مرد اپنی جیبوں میں تیزاب کی بوتلیں لے کر چلتے ہیں‘‘۔ اس جملے پر پروگرام کے دوران بھی اعتراض کیا گیا جبکہ بعد ازاں سوشل میڈیا پر بھی اس بیان پر شدید تنقید سامنے آئی۔
ہمایوں سعید نے بالی ووڈ کے خانز سے بہتر اداکاری کی: خلیل الرحمان قمر
حنا پرویز بٹ نے مؤقف اپنایا کہ اس نوعیت کے ریمارکس معاشرتی حساسیت کو مجروح کرتے ہیں اور خواتین کے خلاف تشدد کے خاتمے کے لیے جاری جدوجہد کو کمزور کرتے ہیں۔ ان کا کہنا تھا کہ ایسے موضوعات پر گفتگو ذمہ داری اور سنجیدگی کے ساتھ ہونی چاہیے تاکہ متاثرین کے لیے انصاف کے راستے مزید مشکل نہ ہوں۔
