ممبئی: معروف بھارتی موسیقار اے آر رحمان کے بیٹے اور پلے بیک گلوکار اے آر امین کار حادثے میں زخمی ہوگئے، تاہم انہیں طبی امداد کے بعد اسپتال سے ڈسچارج کر دیا گیا۔
بھارتی میڈیا کے مطابق اے آر امین پیر کے روز اپنے دوست کے ہمراہ چنئی ایئرپورٹ جا رہے تھے کہ راستے میں ان کی گاڑی ایک ٹیکسی سے ٹکرا گئی۔ حادثے کے نتیجے میں اے آر امین اور ان کے دوست کو معمولی چوٹیں آئیں۔
حادثے کے بعد دونوں کو فوری طور پر کاویری اسپتال منتقل کیا گیا، جہاں طبی امداد فراہم کرنے کے بعد انہیں اسی روز گھر جانے کی اجازت دے دی گئی۔
اے آر امین نے سوشل میڈیا پر اپنے مداحوں کو اپنی خیریت سے آگاہ کرتے ہوئے بتایا کہ حادثے کے وقت وہ گاڑی نہیں چلا رہے تھے بلکہ اگلی نشست پر موجود تھے۔ ان کے مطابق یہ ایک معمولی حادثہ تھا اور تمام افراد محفوظ رہے۔
اے آر رحمان کا انڈین یوٹیوبر رنویر الہ آبادیا تنازعے پر مزاحیہ تبصرہ
دوسری جانب اے آر امین کی بہن خدیجہ رحمان نے بھی وضاحت کی کہ حادثہ اس وقت پیش آیا جب ایک دوسری گاڑی نے مبینہ طور پر سرخ بتی کی خلاف ورزی کی، جس کے باعث دونوں گاڑیوں میں تصادم ہوا۔
پولیس نے واقعے کی تحقیقات شروع کر دی ہیں۔
