لاہور میں راستہ نہ دینے پر موٹرسائیکل سواروں کا کار پر حملہ، توڑ پھوڑ اور تشدد، دو ملزمان گرفتار

تازہ ترین خبروں اور تبصروں کیلئے ہمارا وٹس ایپ چینل جوائن کریں

لاہور کے علاقے سندر میں راستہ نہ دینے پر چار موٹرسائیکل سواروں نے ایک کار کو روک کر اس پر اینٹوں سے حملہ کردیا، گاڑی کی اسکرین توڑ دی اور کار سواروں کو تشدد کا نشانہ بنایا۔ واقعے کی سی سی ٹی وی فوٹیج بھی سامنے آگئی ہے، جس کے بعد پولیس نے کارروائی کرتے ہوئے دو ملزمان کو گرفتار کرلیا۔

latest urdu news

پولیس کے مطابق یہ واقعہ ملتان روڈ پر سندر کے علاقے درویش کوٹ میں پیش آیا، جہاں چار موٹرسائیکل سواروں نے مبینہ طور پر راستہ نہ دینے پر کار سواروں سے جھگڑا شروع کردیا۔

اینٹوں سے حملہ، گاڑی کی اسکرین توڑ دی

سامنے آنے والی سی سی ٹی وی فوٹیج میں دیکھا جاسکتا ہے کہ چار موٹرسائیکل سواروں نے ایک کار کو روک لیا اور اس پر اینٹوں سے حملہ کردیا۔

ملزمان نے گاڑی کی اسکرین توڑ دی اور بونٹ پر بھی اینٹیں ماریں، جبکہ کار میں سوار افراد کو تشدد کا نشانہ بنایا۔

واقعے کی فوٹیج سوشل میڈیا پر بھی سامنے آئی ہے، جس میں گاڑی پر حملے اور توڑ پھوڑ کے مناظر دیکھے جاسکتے ہیں۔

سندر پولیس کی کارروائی، دو ملزمان گرفتار

پولیس نے واقعے کا مقدمہ درج کرکے کارروائی شروع کردی ہے۔ سندر پولیس کے مطابق دو ملزمان افتخار اور محمد علی کو گرفتار کرلیا گیا ہے، جبکہ واقعے میں ملوث دیگر افراد کی تلاش جاری ہے۔

پولیس حکام کا کہنا ہے کہ باقی ملزمان کو بھی جلد گرفتار کرکے قانون کے مطابق کارروائی کی جائے گی۔

کراچی میں 9 کروڑ روپے کی ڈکیتی کے ملزمان پولیس حراست سے فرار، اہلکار کی موٹرسائیکل بھی لے گئے

ڈی آئی جی آپریشنز کا سخت کارروائی کا اعلان

ڈی آئی جی آپریشنز لاہور فیصل کامران نے واقعے پر ردعمل دیتے ہوئے کہا ہے کہ شہر میں بدمعاشی کا کلچر کسی صورت برداشت نہیں کیا جائے گا۔

ان کا کہنا تھا کہ ملزمان کو قانون کے کٹہرے میں لاکر کھڑا کیا جائے گا اور ایسے واقعات میں ملوث افراد کے خلاف کارروائی جاری رہے گی۔

ماخذ: جیو نیوز (لاہور پولیس کے بیان اور جاری کردہ سی سی ٹی وی فوٹیج کی بنیاد پر)

شیئر کریں:

ہمیں فالو کریں