پاکستان کرکٹ بورڈ نے کھلاڑیوں کے ڈسپلن اور رویے سے متعلق سامنے آنے والی میڈیا رپورٹس کا جائزہ لینا شروع کردیا ہے، تاہم بورڈ نے غیر مصدقہ اطلاعات پر مزید تبصرے سے گریز کیا ہے۔
پی سی بی کی جانب سے انکوائری شروع
پاکستان کرکٹ بورڈ (پی سی بی) نے کھلاڑیوں کے ڈسپلن اور رویے سے متعلق مختلف میڈیا پلیٹ فارمز پر سامنے آنے والی رپورٹس پر باقاعدہ انکوائری شروع کردی ہے۔
پی سی بی کے مطابق معاملے کا جائزہ بورڈ کے قواعد و ضوابط کے تحت لیا جا رہا ہے۔ انکوائری کے دوران تمام متعلقہ افراد کو اپنا مؤقف پیش کرنے کا مکمل موقع دیا جائے گا تاکہ معاملے کے تمام پہلوؤں کا جائزہ لیا جاسکے۔
بورڈ کا کہنا ہے کہ کسی بھی فیصلے تک پہنچنے سے قبل متعلقہ افراد کا مؤقف سننا ضروری ہے، اسی لیے انکوائری کے عمل میں تمام فریقین کو اپنا موقف بیان کرنے کا موقع فراہم کیا جائے گا۔
قیاس آرائیوں سے گریز کی ہدایت
پاکستان کرکٹ بورڈ نے بعض پلیٹ فارمز پر گردش کرنے والی اطلاعات کے حوالے سے بھی وضاحت جاری کی ہے۔ پی سی بی کے مطابق ایسی قیاس آرائیوں کو قابلِ اعتبار نہ سمجھا جائے جو باضابطہ طور پر تصدیق شدہ نہیں ہیں۔
پاکستان 23 سال بعد سیف گیمز کی میزبانی کیلئے تیار، بھارت نے دعوت قبول کرلی
بورڈ کے ترجمان نے کہا کہ پی سی بی غیر مصدقہ اطلاعات اور خبروں پر اس مرحلے پر مزید کوئی تبصرہ نہیں کرے گا۔ ترجمان کے مطابق انکوائری مکمل ہونے اور حقائق سامنے آنے کے بعد ہی کسی معاملے پر حتمی مؤقف اختیار کیا جاسکتا ہے۔
لارڈز ٹیسٹ کے بعد کے معاملات بھی زیرِ جائزہ
ذرائع کے مطابق انکوائری میں لارڈز ٹیسٹ کے بعد بعض کھلاڑیوں کو واپس بھیجنے اور مبینہ طور پر ڈسپلن کی خلاف ورزی سے متعلق معاملات کا بھی جائزہ لیا جا رہا ہے۔
ذرائع کا کہنا ہے کہ کھلاڑیوں کے موبائل فون اپنے پاس رکھے جانے کے معاملے کی بھی انکوائری کی جارہی ہے۔ تاہم ان معاملات سے متعلق حتمی حقائق اور ذمہ داری کا تعین پی سی بی کی انکوائری مکمل ہونے کے بعد ہی ہوسکے گا۔
انکوائری مکمل ہونے کے بعد صورتحال واضح ہوگی
پی سی بی کی جانب سے انکوائری شروع کیے جانے کے بعد اس معاملے سے متعلق مختلف قیاس آرائیاں سامنے آرہی ہیں، تاہم بورڈ نے واضح کیا ہے کہ غیر مصدقہ خبروں پر فی الحال کوئی تبصرہ نہیں کیا جائے گا۔
اس صورتحال میں انکوائری کی رپورٹ اہمیت اختیار کرگئی ہے، کیونکہ اس کے ذریعے یہ واضح ہوسکے گا کہ کھلاڑیوں کے ڈسپلن، رویے اور دیگر زیرِ بحث معاملات میں اصل صورتحال کیا تھی اور آیا کسی ضابطے کی خلاف ورزی ہوئی یا نہیں۔
