کراچی میں میر رضا علی کیس میں مبینہ غفلت اور بدانتظامی پر ایس ایچ او گلستان جوہر اور ایس ڈی پی او شارع فیصل ایسٹ زون کو معطل کر دیا گیا۔
پولیس کے مطابق ایس ایچ او گلستان جوہر کامران قریشی کو فرائض میں غفلت برتنے پر ایڈیشنل آئی جی کراچی آزاد خان کے احکامات پر معطل کرکے عہدے میں تنزلی کے احکامات بھی جاری کیے گئے ہیں۔
اسی طرح ایس ڈی پی او شارع فیصل ایسٹ زون محمد ارشد آفریدی کو بھی معطل کر دیا گیا ہے۔
ایڈیشنل آئی جی کراچی آزاد خان کا کہنا ہے کہ فرائض میں غفلت برتنے والے پولیس افسران کے خلاف بلاامتیاز کارروائی جاری رہے گی، جبکہ قواعد و ضوابط اور احتساب کے اصولوں پر مکمل عملدرآمد یقینی بنایا جائے گا۔
پولیس ذرائع کے مطابق دونوں افسران کو میر رضا علی کیس میں غفلت برتنے پر معطل کیا گیا ہے۔
میر رضا کیس: کراچی کے تفتیشی اور میڈیکو لیگل نظام کی کارکردگی پر سوالات اٹھنے لگے
دوسری جانب تفتیشی ذرائع کے مطابق پولیس نے میر رضا علی کے 28 جولائی کو ہونے والے آخری رابطوں کی بھی تحقیقات کا فیصلہ کیا ہے۔ میر رضا نے اس روز تین ٹیلیفون کالز کے ذریعے دو افراد سے بات کی تھی۔
ذرائع کے مطابق میر رضا علی نے 28 جولائی کی شب 2 بج کر 13 منٹ اور 2 بج کر 16 منٹ پر علی نامی شخص سے بات کی، جبکہ آخری کال ان کے دوست عبداللہ کی جانب سے موصول ہوئی، دونوں کے درمیان تین منٹ سے زائد گفتگو ہوئی تھی۔
