امیر جماعت اسلامی حافظ نعیم الرحمن نے اعلان کیا ہے کہ پیٹرولیم مصنوعات کی قیمتوں میں اضافے اور پیٹرولیم لیوی کے خلاف اتوار کو چاروں صوبوں میں وزرائے اعلیٰ اور گورنر ہاؤسز کے سامنے احتجاجی دھرنے دیے جائیں گے۔
لاہور میں احتجاجی مظاہرین سے خطاب کرتے ہوئے حافظ نعیم الرحمن نے کہا کہ عالمی منڈی میں پیٹرولیم مصنوعات کی قیمتیں کم ہونا شروع ہوئیں تو حکومت نے اس کے برعکس ملک میں قیمتیں بڑھا دیں۔ ان کے مطابق مہنگائی اور اضافی ٹیکسوں کا بوجھ براہ راست عوام پر منتقل کیا جا رہا ہے۔
امیر جماعت اسلامی نے کہا کہ پیٹرولیم لیوی کے خلاف احتجاج ختم نہیں ہوگا اور عوام کو اپنے حقوق کے لیے جدوجہد جاری رکھنا ہوگی۔ ان کا کہنا تھا کہ حکومت کی معاشی پالیسیوں نے عام شہری کے لیے مشکلات میں اضافہ کر دیا ہے۔
حافظ نعیم الرحمن نے دعویٰ کیا کہ پیٹرولیم لیوی کی مد میں عوام سے بھاری رقم وصول کی جا رہی ہے اور جماعت اسلامی اس کے خاتمے کا مطالبہ کر رہی ہے۔ انہوں نے کہا کہ بجلی اور پیٹرولیم مصنوعات پر عائد اضافی ٹیکس بھی ختم کیے جانے چاہئیں۔
انہوں نے مزید کہا کہ لاہور میں ہونے والا احتجاج صرف ایک آغاز ہے، جبکہ اتوار کو جماعت اسلامی چاروں صوبوں میں وزرائے اعلیٰ اور گورنر ہاؤسز کے سامنے بھرپور احتجاج کرے گی۔ ان کے مطابق مختلف علاقوں میں کارکنوں کی گرفتاریوں کے باوجود احتجاجی تحریک جاری رہے گی۔
پیٹرولیم لیوی کے خلاف جماعت اسلامی کا ملک گیر احتجاج، 510 مقامات پر دھرنوں کا اعلان
دوسری جانب لاہور میں احتجاج کے باعث فیروزپور روڈ، جیل روڈ، لٹن روڈ، بہاولپور روڈ اور کوئینز روڈ سمیت بعض اہم شاہراہوں پر ٹریفک متاثر ہوئی۔ قرطبہ چوک اور اطراف میں پولیس کی بھاری نفری تعینات کرکے سیکیورٹی کے انتظامات سخت کر دیے گئے۔
جماعت اسلامی کے مطابق ملک بھر کے 170 اضلاع میں تقریباً 510 اہم شاہراہوں پر احتجاج کیا جا رہا ہے۔
