معروف اداکارہ روبینہ اشرف نے زچگی کے بعد خواتین کی ذہنی صحت پر بات کرتے ہوئے کہا ہے کہ بچے کی پیدائش کے بعد بیوی کو جذباتی سہارا، محبت اور شوہر کا وقت دینا بہت ضروری ہوتا ہے تاکہ وہ ڈپریشن اور ذہنی دباؤ سے محفوظ رہ سکے۔
ایک پروگرام میں گفتگو کرتے ہوئے روبینہ اشرف نے کہا کہ ماضی میں حمل اور بچے کی پیدائش کے بعد خواتین کو درپیش ذہنی مسائل کو زیادہ اہمیت نہیں دی جاتی تھی۔ معاشرے میں یہ تصور عام تھا کہ ماں بننا عورت کی ذمہ داری ہے، چاہے وہ اس دوران کتنی ہی جسمانی اور ذہنی مشکلات کا سامنا کر رہی ہو۔
انہوں نے کہا کہ حمل کے دوران خواتین کے جسم، جلد اور مجموعی جسمانی کیفیت میں نمایاں تبدیلیاں آتی ہیں، جبکہ زچگی کے بعد بھی انہیں کئی جذباتی اور جسمانی چیلنجز کا سامنا کرنا پڑتا ہے۔
اداکارہ کا کہنا تھا کہ اس حساس مرحلے میں شوہر اور خاندان کی جانب سے تعاون، سمجھ بوجھ اور حوصلہ افزائی عورت کی ذہنی صحت بہتر بنانے میں اہم کردار ادا کر سکتی ہے۔
