کھاریاں: نواحی علاقے مکیانہ چوک، برسہ روڈ کے قریب پولیس مقابلے کے دوران بین الاضلاعی ڈکیت گینگ کا مبینہ سرغنہ اپنے ہی ساتھیوں کی فائرنگ سے ہلاک ہوگیا، جبکہ دو زخمی ملزمان کو گرفتار کر لیا گیا۔
پولیس کے مطابق ملزمان کو برآمدگی کے لیے لے جایا جا رہا تھا کہ راستے میں چار موٹر سائیکلوں پر سوار چھ مسلح افراد نے پولیس پارٹی پر اندھا دھند فائرنگ کر دی۔ حملہ آور اپنے ساتھیوں کو پولیس حراست سے چھڑوا کر موقع سے فرار ہونے میں کامیاب ہوگئے۔
فائرنگ کا سلسلہ رکنے کے بعد پولیس نے علاقے میں سرچ آپریشن شروع کیا، جس کے دوران تین زخمی ملزمان کو حراست میں لے لیا گیا۔ ابتدائی تحقیقات کے مطابق زخمی ہونے والے ملزمان اپنے ہی ساتھیوں کی فائرنگ کا نشانہ بنے۔
گرفتار زخمی ملزمان کی شناخت محمد منیر عرف مجنوں، شاہ نواز اور محمد ارشد کے نام سے ہوئی، جن کا تعلق بہاولپور سے بتایا جاتا ہے۔ تینوں کو فوری طبی امداد کے لیے ہسپتال منتقل کیا گیا، جہاں گینگ کا سرغنہ محمد منیر عرف مجنوں زخموں کی تاب نہ لاتے ہوئے دم توڑ گیا۔
گجرات میں پولیس مقابلہ، فائرنگ کے تبادلے میں کانسٹیبل شہید، ایک ڈاکو ہلاک
پولیس کے مطابق ملزمان ڈکیتی، چوری اور رہزنی کی تین درجن سے زائد وارداتوں میں مطلوب تھے۔ واقعے کے بعد فرار ہونے والے حملہ آوروں کی گرفتاری کے لیے علاقے میں سرچ آپریشن جاری ہے۔
