دینہ/ جہلم: سی سی ڈی جہلم نے بڑی کارروائی کرتے ہوئے شہریوں کو اسلحہ کے زور پر لوٹنے اور موٹر سائیکلیں چھیننے کی متعدد وارداتوں میں ملوث چار رکنی ڈکیت گینگ کو گرفتار کر لیا۔ سی سی ڈی ٹیم نے ملزمان کے قبضے سے متعدد چھینی گئی موٹر سائیکلیں، نقد رقم اور اسلحہ بھی برآمد کر لیا۔
ذرائع کے مطابق گرفتار ملزمان دو موٹر سائیکلوں پر سوار ہو کر ویران سڑکوں اور کم آمدورفت والے علاقوں میں شہریوں کو اسلحہ کے زور پر لوٹتے تھے۔ وارداتوں کے دوران وہ نقدی، قیمتی اشیاء اور موٹر سائیکلیں چھین کر فرار ہو جاتے تھے۔
ابتدائی تفتیش کے دوران معلوم ہوا کہ چاروں ملزمان آپس میں قریبی رشتہ دار ہیں اور ان کے خلاف دینہ بائی پاس، منگلا روڈ، اقبال ٹاؤن اور دیگر ملحقہ علاقوں میں ڈکیتی اور راہزنی کی متعدد وارداتیں رپورٹ ہو چکی تھیں۔
تحقیقات کے مطابق ملزمان چھینی گئی موٹر سائیکلوں کو دوسرے علاقوں میں فروخت کر دیتے تھے۔ پولیس نے کارروائی کے دوران ان کے قبضے سے متعدد موٹر سائیکلیں، اسلحہ اور نقدی برآمد کر لی ہے، جبکہ مزید تفتیش جاری ہے تاکہ گینگ کے دیگر ساتھیوں اور مزید وارداتوں سے متعلق حقائق سامنے لائے جا سکیں۔
لاہور میں سی سی ڈی کی کارروائیاں، مبینہ پولیس مقابلوں میں 3 افراد ہلاک
ذرائع کا کہنا ہے کہ گرفتار ملزمان دینہ میں کرائے کے مکان میں رہائش پذیر تھے اور ان کا تعلق کے پی کے کے مختلف علاقوں سے بتایا جاتا ہے۔
سی سی ڈی حکام کے مطابق ملزمان کے خلاف قانون کے مطابق کارروائی جاری ہے اور انہیں ٹھوس شواہد کے ساتھ عدالت میں پیش کیا جائے گا، جبکہ ضلع میں جرائم پیشہ عناصر کے خلاف بلاامتیاز کریک ڈاؤن آئندہ بھی جاری رکھا جائے گا تاکہ شہریوں کے جان و مال کا تحفظ ہر صورت یقینی بنایا جا سکے۔
