اسلام آباد: وزیر دفاع Khawaja Asif نے کہا ہے کہ پاکستان کو درپیش بعض سیکیورٹی چیلنجز میں افغانستان سے سرگرم عناصر کے کردار کے شواہد موجود ہیں اور آزاد کشمیر میں انتشار پھیلانے کی کوششوں میں بھی بیرونی مداخلت کے آثار دیکھے گئے ہیں۔
پارلیمنٹ ہاؤس کے باہر میڈیا نمائندوں سے گفتگو کرتے ہوئے وزیر دفاع نے کہا کہ ایران اور امریکا کے درمیان حالیہ کشیدگی میں کمی آنے کے بعد اب توجہ خطے میں دیگر اہم سیکیورٹی معاملات پر مرکوز کی جا سکتی ہے، جن میں افغان سرحد سے متعلق مسائل بھی شامل ہیں۔
خواجہ آصف کا کہنا تھا کہ پاکستان خطے میں امن اور استحکام کا خواہاں ہے اور تمام تنازعات کو مذاکرات اور باہمی افہام و تفہیم کے ذریعے حل کرنے کو ترجیح دیتا ہے۔ تاہم اگر دوسری جانب سے مثبت ردعمل نہ ملا تو پاکستان اپنے قومی مفادات کے تحفظ کے لیے دیگر ممکنہ اقدامات پر بھی غور کر سکتا ہے۔
وزیر دفاع نے آزاد کشمیر کی صورتحال کا ذکر کرتے ہوئے دعویٰ کیا کہ بعض شرپسند سرگرمیوں کے پس منظر میں افغانستان سے جڑے عناصر کا کردار سامنے آیا ہے، جس پر متعلقہ ادارے نظر رکھے ہوئے ہیں۔
مہاجر نشستوں کے خاتمے کا مطالبہ انتخابی عمل کو متاثر کرنے کی کوشش ہے، خواجہ آصف
انہوں نے مقبوضہ کشمیر میں انسانی حقوق کی صورتحال پر بھی تشویش کا اظہار کرتے ہوئے کہا کہ کشمیری عوام مختلف پابندیوں اور مشکلات کا سامنا کر رہے ہیں۔ ان کے مطابق کشمیری عوام کی جدوجہد اور ان کے سیاسی و قومی حقوق کا مسئلہ پاکستان کی خارجہ پالیسی کا اہم حصہ ہے۔
خواجہ آصف نے مزید کہا کہ پاکستان نے ہمیشہ کشمیری عوام کی سیاسی، سفارتی اور اخلاقی حمایت جاری رکھی ہے اور مستقبل میں بھی ان کے حقِ خودارادیت کے مؤقف کی حمایت کرتا رہے گا۔
