جہلم میں دن دیہاڑے مسلح ملزمان نے پولیس اہلکاروں کو لوٹ لیا، ملزمان اسلحہ چھین کر فرار ہو گئے۔
تفصیلات کے مطابق جہلم میں تھانہ کالا گجراں کے علاقے میں دن دیہاڑے پیش آنے والی ایک واردات میں مسلح موٹر سائیکل سوار ملزمان نے گشت پر مامور پولیس اہلکاروں کو یرغمال بنا کر ان سے سرکاری اسلحہ اور موٹر سائیکل کی چابی چھین لی اور فرار ہو گئے۔
پولیس ذرائع کے مطابق واقعہ اس وقت پیش آیا جب پولیس اہلکار معمول کے گشت پر موجود تھے۔ اس دوران مسلح ملزمان نے انہیں اسلحہ کے زور پر روک لیا، یرغمال بنایا اور سرکاری اسلحہ سمیت موٹر سائیکل کی چابی چھین کر موقع سے فرار ہو گئے۔
واقعہ کے بعد علاقے میں تشویش کی لہر دوڑ گئی جبکہ پولیس نے فوری طور پر ملزمان کی تلاش کے لیے کارروائیاں شروع کر دیں۔
پولیس کا کہنا ہے کہ واردات کے بعد مختلف مقامات پر نصب سی سی ٹی وی کیمروں کی فوٹیج حاصل کر لی گئی ہے، جس کی مدد سے ایک ملزم کی شناخت بھی کر لی گئی ہے۔ ابتدائی تحقیقات کے مطابق شناخت ہونے والا ملزم متعدد مقدمات میں مطلوب اشتہاری ہے اور اس کا تعلق سرائے عالمگیر سے بتایا جاتا ہے۔
جہلم میں شہری کے گھر پر قبضے کے مقدمہ میں مطلوب اشتہاری مجرم گرفتار
سی سی ٹی وی فوٹیج میں ملزمان کو واردات کے بعد موٹر سائیکل پر فرار ہوتے ہوئے بھی دیکھا جا سکتا ہے۔
پولیس حکام کے مطابق ملزمان کی گرفتاری کے لیے مختلف مقامات پر چھاپے مارے جا رہے ہیں اور انہیں جلد قانون کی گرفت میں لایا جائے گا۔
ذرائع کے مطابق واقعہ کی مزید تفتیش جاری ہے جبکہ پولیس تمام پہلوؤں کا جائزہ لے رہی ہے تاکہ واردات میں ملوث ملزمان کو گرفتار کر کے قانون کے کٹہرے میں لایا جا سکے۔
