پاکستان مسلم لیگ کے سینئر نائب صدر اور وفاقی وزیر چودھری سالک حسین نے کہا ہے کہ خیبرپختونخوا میں امن و امان کی بگڑتی صورتحال انتہائی تشویشناک ہے اور اس پر فوری و مؤثر اقدامات کی ضرورت ہے۔
پاکستان مسلم لیگ خیبرپختونخوا کے وفد سے ملاقات کے دوران انہوں نے کہا کہ سیکیورٹی فورسز پر حملے، سیاسی و سماجی شخصیات اور علمائے کرام کی ٹارگٹ کلنگ صوبے میں بڑھتے ہوئے خطرات کی عکاسی کرتی ہے، جن پر قابو پانے کے لیے سنجیدہ حکمت عملی اپنانا ناگزیر ہے۔
چوہدری سالک حسین کی سردار محمد یوسف اور چوہدری الیاس سے ملاقات
چودھری سالک حسین نے صوبائی حکومت کی جانب سے قلم چھوڑ ہڑتال کو افسوسناک اور عوام دشمن اقدام قرار دیتے ہوئے کہا کہ ایسی سرگرمیوں سے صحت، تعلیم اور دیگر انتظامی معاملات بری طرح متاثر ہوتے ہیں، جبکہ عوام کو مشکلات کا سامنا کرنا پڑتا ہے۔
یہ گفتگو انہوں نے پاکستان مسلم لیگ خیبرپختونخوا کے صدر اور کوآرڈینیٹر برائے اوورسیز پاکستانیز و انسانی وسائل انتخاب خان چمکنی کی قیادت میں ملاقات کرنے والے وفد سے کی۔ وفد میں صوبائی ایڈیشنل جنرل سیکرٹری بلال محمدزئی، عبدالباسط اور سینئر رہنما ریاض خان بھی شامل تھے۔
ملاقات کے دوران انتخاب خان چمکنی نے وفاقی وزیر کو خیبرپختونخوا کی سیاسی، انتظامی اور امن و امان کی مجموعی صورتحال سے تفصیلی آگاہ کیا۔
