وزیراعظم شہباز شریف نے کہا ہے کہ موجودہ معاشی چیلنجز کے دوران حکومت معاشی طور پر کمزور طبقے کو اکیلا نہیں چھوڑے گی اور کمزور و متوسط طبقے کے لیے مزید ریلیف فراہم کرنے کی کوششیں جاری ہیں۔ انہوں نے اس بات پر زور دیا کہ بحران کے باوجود حکومت نے عوام کی ضروریات کو پورا کرنے کے لیے بروقت اقدامات کیے ہیں۔
اجلاس میں ایندھن اور عوامی ریلیف کا جائزہ
وزیراعظم کی زیر صدارت ہونے والے اجلاس میں ملک میں موجودہ ایندھن ذخائر اور عوامی ریلیف اقدامات کا تفصیلی جائزہ لیا گیا۔ اجلاس میں ایندھن کی بچت اقدامات، سادگی مہم کی پیشرفت اور انٹیلی جنس بیورو کی آڈٹ رپورٹ بھی پیش کی گئی۔ بریفنگ میں بتایا گیا کہ ملکی ضروریات کے لیے ایندھن کے مناسب ذخائر موجود ہیں اور مستقبل میں بھی ان کی فراہمی کے لیے اقدامات کیے جا رہے ہیں۔
اجلاس میں یہ بھی بتایا گیا کہ ادویات کے وافر ذخائر موجود ہیں اور بڑی گاڑیوں میں ہائی آکٹین ایندھن پر لیوی میں اضافے کے باوجود جیٹ فیول کی قیمتوں میں کوئی تبدیلی نہیں آئی۔
عوامی ریلیف کے لیے اقدامات
وزیراعظم نے کہا کہ موجودہ حالات میں قربانی کا سلسلہ حکومتی اخراجات میں کمی سے شروع کیا گیا۔ سرکاری اخراجات میں کٹوتی، ترقیاتی بجٹ میں کمی اور 60 فیصد سرکاری گاڑیوں کو فوری طور پر بند کیا گیا۔ انہوں نے مزید کہا کہ تیل کی قیمتوں میں اضافے کی تجاویز کو مسترد کرکے بچت شدہ رقم عوامی ریلیف کے لیے استعمال کی گئی۔
عمران خان ریلیز فورس منصوبہ ختم، پی ٹی آئی کے سخت گیر عناصر کو بڑا دھچکا
شہباز شریف نے واضح کیا کہ ڈیجیٹل نظام کے ذریعے ریلیف کے اقدامات براہِ راست عام آدمی تک پہنچائے جائیں گے، تاکہ کمزور اور متوسط طبقے کو بروقت سہارا مل سکے۔ انہوں نے کہا، "مشکل کی اس گھڑی میں معاشی طور پر کمزور طبقے کو اکیلا نہیں چھوڑیں گے، بحران کے باوجود ایندھن کی فراہمی میں کسی قسم کا تعطل نہیں آنے دیا گیا۔”
بین الاقوامی اور سفارتی پہلو
وزیراعظم نے اس بات پر بھی زور دیا کہ پاکستان خطے میں امن کے قیام کے لیے سفارتی محاذ پر بھرپور کوششیں کر رہا ہے، اور ملکی سلامتی اور ترقی کو یقینی بنانے کے لیے مسلسل اقدامات جاری ہیں۔
