فیصل آباد میں عید کی نماز کے بعد میڈیا سے گفتگو کرتے ہوئے وزیراعظم کے مشیر برائے سیاسی امور Rana Sanaullah نے عوام پر زور دیا ہے کہ وہ پیٹرول اور گیس کے استعمال میں نمایاں کمی کریں۔ ان کا کہنا تھا کہ اگر قوم نے کفایت شعاری اختیار نہ کی تو عالمی سطح پر بڑھتی قیمتوں کے اثرات پاکستان پر بھی پڑ سکتے ہیں۔
انہوں نے کہا کہ موجودہ حالات میں ملک کو اندرونی اور بیرونی چیلنجز کا سامنا ہے، تاہم سیاسی اور عسکری قیادت ان مسائل سے نمٹنے کے لیے سرگرم عمل ہے۔ ان کے مطابق پاکستان عالمی سطح پر ایک اہم حیثیت اختیار کر چکا ہے اور مختلف علاقائی معاملات میں متوازن مؤقف اپنا رہا ہے۔
افغانستان سے متعلق گفتگو کرتے ہوئے رانا ثناء اللہ نے کہا کہ پاکستان کسی بھی قسم کی جنگ یا مداخلت کا خواہاں نہیں، بلکہ صرف یہ چاہتا ہے کہ افغان سرزمین کو پاکستان کے خلاف دہشتگردی کے لیے استعمال نہ ہونے دیا جائے۔
انہوں نے دہشتگردی کے خلاف جاری کارروائیوں کا حوالہ دیتے ہوئے کہا کہ ایسے عناصر کے خلاف سخت اقدامات کیے جا رہے ہیں اور اگر دوبارہ ایسی سرگرمیاں سامنے آئیں تو ان پر کڑی نظر رکھی جائے گی۔
عالمی سطح پر تیل مہنگا، خام تیل کی قیمتیں 100 ڈالر سے تجاوز کر گئیں
سیاسی صورتحال پر بات کرتے ہوئے انہوں نے کہا کہ احتجاج کی کالز کو عوام پذیرائی نہیں دے رہے اور ملک میں جمہوری عمل کو آگے بڑھانے کی کوششیں جاری ہیں۔ ان کا کہنا تھا کہ سیاسی مذاکرات کے دروازے کھلے ہیں، تاہم کسی قسم کی ڈیل کی گنجائش موجود نہیں۔
آخر میں توانائی بچت مہم کے حوالے سے انہوں نے دوبارہ زور دیتے ہوئے کہا کہ ہر شہری کو چاہیے کہ وہ پیٹرول اور گیس کا استعمال کم از کم 50 فیصد تک کم کرے تاکہ معیشت پر بوجھ کم کیا جا سکے۔ ساتھ ہی انہوں نے یہ بھی بتایا کہ پنجاب میں بلدیاتی انتخابات کے انعقاد کی تیاریاں مکمل ہو چکی ہیں اور جلد اس کا اعلان متوقع ہے۔
